Entertainment Society of Mizoram (ESM) buatsaih Mizo Film Award 2023 chu September 29, 2023 hian sem a ni dawn a, nomination pawh tihchhuah tawh niin ngaihven pawh a hlawh hle. Tun tumah chuan nominee te bihchhianna kan rawn nei dawn a, a dik berah kan tihna erawh a ni lo tih min lo hriat sak dawn nia. 

Best Film : He category hi film award hrang hranga an ngaih hlut ber a ni a, Best Picture tiin an sawi thin bawk. Film tha tak tak zinga a tha ber thlan chhuah hi thil awl ai a ni dawn lo a, tun tumah pawh hian mipui ngaihdan a hrang viau a nih pawhin a mak lo ang. Amawii, Driver Kima, Lalpa A Tha leh Nukawki Pasal te hi film tha tak tak vek an ni a, sum lakluh kawngah pawh an che tha hlawm hle - Best film atana thlan tlak thiau ti ila kan sawi sual awm lo e.  

Best Director : Mipuiin an beisei hmuh loh an nei a, chu chu Mapuia Chawngthu (Leitlang Picture) a ni. Hei hi thil mak ang reng tak a ni a, a sulhnu en phei chuan a mak leh zual. Mahse tun hnaiah film director tha tak tak an rawn chhuak a, Mapuia Chawngthu meuh pawh an rawn nek chhuak ta hial mai - hmasawnna duhawm tak a ni!
Hetih lai hian - B. Lalbiakvela, Drew Pachuau, Malsawma Fanai leh Mike te an rawn lang a, tu berin nge award dawng ang tih erawh hriatthiam harsa tak a ni. 

Best Cinematographer : Director tluk zeta pawimawh an ni a, nominee te pawh an hrawl hlawm hle. Mapuia Chawngthu (MiMi)
Ngaihawma Fanai (Nukawki Pasal), Osiama Pictures (Kherawlai) leh R.Vanlalruata (Amawii) te an ni a, a tha hlawm hle. Ngaihawma Fanai hian Mizo Film Award 2021-ah khan 'Dengi I Love' hmangin he award hi a lo dawng tawh a, a hum him thei ang em tih chu hunin a hril thuai dawn e. 

Best Screenwriter : Script ziaktute an ni a, an pawimawh zia sawi nawn a ngai lo - an hlutna anga ngaihhlut erawh an hlawh chiah lo em aw tih theih a ni. Nukawki Pasal ziaktu B. Lalbiakvela a lang leh a, Amawii ziaktu Mike a lang bawk. Ramri ziaktu Nuna Hrahsel leh Pa Hausa ziaktu Samuel Pachuau te an lang bawk - a ngaihnawm dawn. 

Best Series : Feature film ni lo, episode anga tihchhuah ho hi an ni. Boss Amanda, Keimahni, MiMi leh Pa Hausa te an lang a, an buk a rit hlawm viau mai. Category thar a ni bawk a, award dawng hmasa ber tan pawh a hlu zual khawp ang le. 

Best Actor : Mipui ngaihven a ni a, nominee te pawh an tha tlang hle. Mizo Film Award-a Best Supporting Actor lo la tawh K. Vanlalawmpuia chu a rawn invawrh chho a, award kawl mektu Papuia Pachuau te nen an inel dawn.  Anni bakah hian Ka U Liana film-a chang thiam zet mai Vanlalhmangaiha leh Amawii changtupa V.S. Laldinpuia te an la awm cheu bawk. 

Best Actress : Amawii film en tawhte chuan a thiam zia an sawi thin, a changtunu Feli Ralte kha a vawi khat nan a rawn lang. Rosangpuii Ralte pawh rin lawk ang ngeiin a rawn ang leh a, tun laia boruak nei lian Sangsangi a rawn lang bawk - Lalpa A Tha film-a a changtunu Siami Chawngthu te nen an awmho a ni. 

Best Supporting Actor : Hee category-ah hian Gilbert Colney, Lalremruata Royte, Remlalnghaka leh Tommy Rosangliana te an lang a, mipui lamah chuan Driver Kima star Tommy buk a rit viau mai thei. 

Best Supporting Actress : Thaibawih film-a chang thiam zet mai, Lerlawri tia lar H. Zorampari bakah, a chanpui tawng thei lo lema chang Malsawmtluangi Tochhawng te an lang. Anni bakah hian Maneihi Fanai leh Ruthi Chenkual te an la awm cheu bawk - award dawng tur hriat a chakawm tawh viau mai. 

Best Short Film : Eleison : Zahngai Rawh!, Inspector Arina, Nun Duhawm Zawk leh Tlan Rawh tih te an lang a, award dawng tur rin thiam a harsa hle. 

Best OST : Film tluk zetin OST pawh a tam a, thlan thiam pawh a harsa viau mai thei - category thar a ni bawk. Gospel leh Lengzem thliar hran tham a awm si lo a, huang khatah khung khawm an ni. An ti - JH Peka & Deborah (Mo Kawr), I hmeltha - Regina & JH Peka (Nukawki Pasal) leh Kha ni kha - Young Fella, Smiley ft Travis (Black Rose) te chu Lengzem lam atang lang an ni a, Gospel atangin Lalpa a tha - Lalduhsaki (Lalpa a tha) a lang ve thung. 

People's Choice Award : Hei pawh hi category thar a ni a, mipui vote hmang liau liaua thlan tur a ni. Category dangho aiin nomination-a lang an tam a, a ngaihnawm viau dawn a ni. Mipui vote hmanga film tha ber thlanna tur a nih avangin a boruak viau ang. Amawii, Black Rose, Driver Kima, Ka U Liana, Lalpa A Tha, Nukawki Pasal, Pa Hausa leh Thaibawih te an lang.