Entertainment Society of Mizoram (ESM) buatsaih Mizo Film Award chu a vawi hnih nan Zirtawpni zan khan Vanapa Hall-ah sem a ni leh ta a, Best Film atan 'Amawii' thlan a ni. Hetih lai hian 'Pa Hausa' chu award hui hnem ber a ni a, Drew Pachuau leh a hote hian award pali lawih an hum haw. 

Award ceremony hi Sports Minister Pu Robert Romawia Royte chuan khuallian niin a hmanpui a, Best Screenwriter award a hlan nghal bawk. Category 12-ah award sem chhuah a ni a, zaithiam leh lamthiam ten kalkhawm mipui an awi bawk. 
Amawii a mawi!

Category hrang hrang zinga ngaihhlut leh dah san ber chu Best Film a ni a, Best Picture tiin an sawi thin bawk. He category-a langte hi an tha hlawm hle a, award dawng tur ber pawh rin thiam harsa tak a ni. In-House film siam 'Driver Kima', Malsawma Fanai kutchhuak 'Lalpa A Tha' leh B. Lalbiakvela film siam 'Nukawki Pasal' te khumin Zote Entertainment film hit 'Amawii' chuan he award hi a la ta a ni. 

An director Mike chuan lawmthu sawiin, "Kum riat kal ta khan heti hian hmaichhanah min ti a, 'zu ngawl vei i ni a, i dang a awk leh nghal. Chutah film i tui a, min tuman i film siam an en peih lo ang. Tin, i tawng tuman an hre ngai lo ang, min an nuih liam ang che' min ti thin. Mahse tihian ka chhang a ni, engtik niah emaw chuan he zu ngawl vei fapa hian award a la la ve ang a, engtik niah emaw chuan he a dang awk ang ang hian mi hmaah thu a sawi ang tiin ka sawi thin. Tunah hian ka dang a la awk reng a, mahse Pathian zarah thu ka sawi ve thei ta," tiin a sawi a, kut beng thawm a ring tha hle.   

Mike hi film director kan neih that ber zinga mi a ni chho mek a, nomination-ah pawh a kut chhuak film eng emaw zat an lang. Amawii, Thaibawih leh Ka U Liana te an langsar a, award ngaihhlut ber Best Film hial an hlawhchhuak thei hi an lawmpui awm hle. 

Pa Hausa a hausa haw...
Nomination puan a nih atanga boruak nei lian ber tih ngam chu Pa Hausa hi a ni a, rin lawk ang ngeiin award pawh a la hnem hle. Pa Hausa hian category thar Best Series a la nghal pang a, a phu zia chu mipui vote atang pawhin a hriat theih awm e. 
An director Drew Pachuau chu Best Director atan thlan a ni a, Mapuia Chongthu hnua he award dawng thei a nih avangin a hlutna a zual ngei ang. 

A changtupa Papuia Pachuau chu Best Actor award hlan a ni a, People's Choice Award an la tel bawk. People's Choice Award  hi mipui thlan a nih avangin a hl hle a, Pa Hausa mipuiah a tla na tak zet tih a hriat. Mizo Film Award 2023-ah award panga ngawt hlawh chhuak thei Pa Hausa cast & crew tw an fakawm tak zet e. 

Best Actor & Actress
Award category zinga ngaihven hlawh ber pakhat chu Best Actor leh Best Actress te hi a ni a, tun tumah pawh a boruak leh viau. Mizo Film Award 2021-a Best Actor atana thlan Papuia Pachuau bawkin he award hi a la leh a, award dawng nawn thei awm chhun a ni ta. Papuia Pachuau chuan film industry-a amah hruailuttu  Adama (Chanmari), Mapuia Chongthu (Leitlang Pictures) leh Siama (SVP) te chungah lawmthu a sawi a, "Ka actors puite tang nasa rawh u, a chhan chu hei hi lak zel ka la tum a nia.." tiin, Best actor award trophy a lek kang a, entu mipui thawm a ring tha hle.  

Best Actress ni lai Rosangpui Ralte chuan a title a hum zo ta lo a, 'Lalpa A Tha' film-a chang thiam em em mai Siami Chawngthu chuan a vawi khat nan award a dawng. Siami Chawngthu hi Missionary-in hmun dangah a awm avangin award hi a dawng thei lo a, an director Malsawma Fanai chuan a dawn sak a ni. 

Mapuia Chongthu 
Kumin bikah Mapuia Chongthu a langsar tawk lo a, mimala a lanna Best Cinematographer-ah erawh tluk zo an awm chuang lo. Mapuia hi Mizo Film Award 2021-ah khan Best Director a ni a, kuminah erawh a film siam 'MiMi' hmangin Best Cinematographer a dawng a ni - eng emaw rokhawlhna avangin award ceremony-ah a inlan lo thung. 

Nukawki Pasal film siamtu B. Lalbiakvela chuan Best Screenwriter award a dawng a, award sem hmasak tuma hit zet mai 'Dengi I Love You' siamtu kha niin, award a dawng hi a mak lo. Best Supporting Actor thar a awm leh ta bawk a, a hming chu Tommy Rosangliana a ni. Tommy hi 'Driver Kima' film-ah khan Papuia Pachuau nen an chang dun a, a hit rem rem hle a nih kha - award dawn a phu lo tingam an awm dawn em ni!

'Ka U Liana' star Ruthi Chenkual chu Best Supporting Actress atan thlan a ni a, hei pawh hian a phu hle. Ruthi Chenkual hi tun lai film star kan neih that berte zinga mi a ni a, a chan dan a zira Best Actress ni cho thei hial tura beiseiawm ber pakhat a ni. 
Best Short Film category-ah Raymond Colney film siam 'Eleison : Zahngai Rawh!' tih chuan phu takin award a la a, Best OST-ah rin lawk ang ngeiin 'Lalpa A Tha' chuan award a dawng bawk. 

Mizo Film Award 2023 hi Zonuni Pachuau chuan a host a ni.