Tun hnaiah Mizo film chhuak thar a tam lo a, a awm chhun te erawh a en tlak viau hlawm. Krismas hmain film chhuak thar tur a awm leh dawn a, November 29 hian 'Keimi' film tlangzarh a ni ang. 

He film hi traditional fiction behchhana siam a ni a, romance, drama leh thriller inkawp ti ila kan sawi sual awm lo e. He film-ah hian dawithiam atanga ramhuai thlengin hmuh tur a awm vek dawn a, mit tlai viu dawn a ni. 

Keimi hi YouTube lama Christo Pa tia kan hriat lar Rda kut chhuak a ni dawn a, belhchian a dawl hle tura ngaih a ni. A film siam vawi khatna tur a ni thung dawn a, engtiang chiaha thiam nge tih chu a hriat theih thuai dawn e. 

A changtute pawh film lamah chuan mi thar an ni a, a siamtute nen an tawn hriat neih a inang tawk viau mai. Film lo chang ve zuai tawhte pawh awm tho mah se, role lian tham chang an la awm lo a, mi thar tia sawi theih vek an ni. A thawnthu hi mi pathum - Christo Pa, Dwm Pachuau leh AB-a Hmar te irawm chhuak a ni baw. 

OTT-ah?

Keimi hi application lamah dah chhuah a ni dawn a, eng app-ah nge an dah dawn tih erawh a la hriat loh. He film siamtute hian movie dahna tur app thar an buaipui mek a, an la tlangzarh lo. Veng leh khaw hrang hrangah show kalpui phawt a ni dawn a, kumin chhung chuan OTT lamah an dah chhuak kher lo mai thei. 

Christo Pa chuan, "App kan nei ve a, mah se kan la tlangzarh lo. Engtikah nge kan tlangzarh dawn ka la hre lo a, kuminah pawh a ni mai thei," tiin a sawi a, an film siam Keimi chu app thar lawm nana hman n tum thu a sawi.