Mizo film thar 'Hawrawp Hnuhnung Ber' chu zanin dar 8:00pm hian Vanapa Hall-ah tlangzarh a ni dawn ta - a hmuna kalte tan enho nghal tur a awm ang. He fim hi Melody G. Fanai kutchhuak a ni a, lemchan thiam tak tak eng emaw zat an inlan a ni. 

Kuminah Mizo film chhuak thar a awm nual tawh a, en hlawh tak tak vek an ni. 'Hawrawp Hnuhnung Ber' pawh hi beisei a sang a, Gospela Tlau, Mickey Chhangte leh Eddie Tochhawng te an inlan avangin en man hla tur tak a ni. 

An director hi Melody G. Fanai a ni a, hmeichhe kutchhuak film kan hmu dawn tihna a nih chu. Melody G Fanai chuan, "Mizo film hi zirtir nei deuh vek a ni thin a, tun tuma mi erawh a ni dawn lo. Rilru khawih tak leh zirtir nei tha chu a tha teh meuh mai, tun tuma mi erawh chutiang a ni dawn lo - hmuhnawm tawp tura siam a ni," tiin, an film kalphung tur ZALEN a lo hrilh tawh. 

He film-ah hian action a tam viau dawn a nih hmel a, film lama tawn hriat lo nei tawh leh mi thar an inpawlh nauk dawn avangin en a man hla ang. A vawi khat nan RJ Mickey chuan film a chang a, eng role nge a play hriat a chakawm tawh hle. Ani bakah hian zaithiam - Ronald Zothantluanga, Zirtluangpuii leh Lalthlengliani te an inlan cheu bawk. 

'Hawrawp Hnuhnung Ber' hi man chawiin a duh a piang tan en theih turin Lersia Play App-ah dah a ni dawn a, film siamtute chuan he film hi ti leak-out lo turin mipuite an ngen tak meuh a ni. Zanin bikah hian a hmuna en duh tan ticket Rs. 200 man siam a ni bawk.