Wayward Production kut chhuak Mizo film nghahhlelhawm tak 'The Sky is Our' chu July thla tawp lam hian tihchhuah a ni dawn ta. He film hi Mizo film puitling, India ram pawna shoot hmasak ber nia hriat a ni a, a changtute pawh an tha hlawm hle. 

'The Sky is Ours' hi November 2023 atanga shoot tan kha niin, tunah chuan release tura peih a ni thawkhat tawh. An OST, 'Thlah lo turin' - Lilac and Jacks sak pawh tihchhuah a nih atangin a hit nghal hle a, Youtube-a dah chhuah a nih atanga ni 10 chhungin 626k views a nei hman a ni.    

Wayward Production chuan, "He film hi theihtawpa ulukin kan siam a, hautak deuh mah se kan rualawh em avangin Foreign-a shoot kan duh a, uluk taka plan chungin tluang takin kan ti thei hram a, kan lawm ve hle. A musical score leh foley hi Lalsangliana Zadeng, (SLA Production) Leeds, UK-a awm mek kutchhuak a ni a, a movie lan dan leh an thawmhnaw hak thlengin kan ngaih pawimawh em em a, Estee Lauder Beauty Advisor lo ni tawh, Dina Varte-in make up lam a buapui a, Lalrinenga (Vavoo Interior)-in set design a khawih bakah a scene mila thawmhnaw hak tur thlangtu (stylist) hi Andria Fanai a ni. Hetiang taka kan inbuatsaih ve avang hian Mizo Film Industry-ah a tha zawnga hnuhma kan hnutchhiah ngei kan beisei," tiin a sawi.  

Zonet Empai-a tihchhuah turin, Wayward Production leh Zonet Tv Pvt. Ltd., chuan ni 25/6/2024 khan inremna an ziak a, Zonet chuan awlsam taka mi tam zawkin Zonet Empai atanga an en theih na'n Online Payment bakah Mizoram hmun hrang hrangah voucher hmanga lei theih tura zawrh a nih tur thu an sawi.

A changtute

Mizo film budget sang ber pawlah hian, Mizo Model lar pathum - Lalrinzuala, Kima Hmar leh Christina Pautu te an chan bakah, India rama Foreign model hlawh sang ber lo ni tawh, Brazilian model Chris Rodrigues a chang bawk. 

Anni bakah hian Mizo actor thawm nei lian tak, Timothy Vangchhia a tel a, Henry Hmangaihawma, Lalduhawmi leh Miss East India 1995 Runner Up, Zikpuii Sailo te an inlan dawn bawk. Tun hnaia Mizo film Industry-a hming langsar em em Maruata Rawite leh Sangsangi te an inlan cheu bawk. 

He film hi Jeremy Hauhnar Direct a ni a, DOP-ah Jon Mizo an hmang. Executive Producer Lalsangpuii Hnamte niin, Zaithanmawia leh David Lalmuanpuia te produce a ni. Chhungkuaa en theih tur PG ratings bakah, 18+ ratings a hrana siam a ni a, Northeast audience tinzawnin English Sub-title dah a ni bawk ang.