Mizo Film Award 2021 Best Actor dawngtu Papuia Pachuau channa 'RAMRI' film chu Zirtawpni zan khan Hyve City Hall-ah tlangzarh a ni a, a duh a piang en theih turin Lersia Play App lamah chhawpchhuah a ni. 

He film hi ramri kaihhnawih a ni a, ramri depa awm Vairengte khua atanga lo chhuak a ni nghe nghe - a va inhmeh tak em! An director Nunna Hrahsel hian 'Comrades' film a lo tichhuak tawh a, Mizo Film Award 2021-ah pawh khan chawimawina dawng thei tura chhawpchhuah zingah a tel phak a nih kha. Tu tuma a kutchhuak 'Ramri' film pawh hi en man hla tur tak a ni a, Mizo ten lemchan thiam kan neih that ber zinga mi Papuia a inlan miau avangin dah hniam theih a ni lo bawk.  

Director of Photography hi Osiama Pictures a ni a, ani pawh hi video production lamah chuan mi thar a ni tawh lo, belhchian a dawl viau beisei ang.  

A changtute 
'Ramri' film-a a changtu tam zawk hi chu Vairengte lam mi an ni a, a hmuna awm an ni bawka an role play an chiang hlein a rinawm. Aizawl lam atanga inlan turte hi - Papuia Pachuau, Pepei Hnamte leh Zothansanga Harshsel te an ni a, Pepei Hnamte hi Tiktoker niin thalai lam chuan an hre sa furin a rinawm. 

Shooting hi September thla tir atang khan tan a ni a, thla khat chhungin zawh fel a ni. Chhun zan zawmin rim takin an bei a, tunah chuan en theihin peih fel a ni ta a ni. He film siam nana an budget hi Rs. 20,0000 a ni a, Hollywood leh Bollywood te nen chuan khaikhin chi a ni lo. Chutih rual chuan Mizo film industry hmasawnna hmuh theihin a thang chho zel a, mipui ten kan thlawp that phawt chuan hma kan sawn chho zelin a rinawm.