February kan chuang kai chauh a, Mizo film chhuak thar erawh a awm leh nual tawh. Aizawl lama film siamtu hriat hlawh In-House Production leh Zote Entertainment ten film hit tak an tichhuak a, tun tumah chuan Lunglei lam atangin kan hmu ve dawn thung a ni. 'Thih leh Dam' film hi he lama tawnhriat ngah tawh tak B. Lalbiakvela (Bv-a) kut a ni leh dawn a, a hmuhnawm leh viau ang. 

Conflate Video Production neitu Ngaihawma Fanai nen an thawk dun leh a, an kutchhuak entawhte chuan an thiam zia kan hre theuh awm e. An kutchhuak zingah Dengi I Love You leh Nukawki Pasal te pawh a tel a, Dengi I Love You phei chuan Mizo Film Award 2021-ah khan award thahnem tak a lo hlawh chhuak tawh a ni. 

A changtute 

Tun tumah hian film lama tawn hriat nei tha leh mi thar an inpawh nuk dawn. Mizo Film Award-a Best Aactor leh Best Supporting Actor lo ni tawh Papuia Pachuau leh K. Vanlalawmpuia te kan hmu dawn a, hei ngawt pawh hi en tichakawmtu a tling. Anni bakah hian Gilbert Colney kan hmu dawn bawk a, Ambush, Ramri leh film dangahte a lo inlan tawh avangin role pawimawh tak a chan ngei a rinawm. 

Hmeichhe lamah Esther Hadasi Ralte kan hmu dawn a, Ka U Liana, Khurkhurum leh film dang eng emaw zatah a lo inlan tawh - kan hre fur awm e. Ani bakah hian Msi Chhangte leh Pinky Zorempuii te kan hmu dawn bawk a, en man hla tak a ni dawn. 

A thawnthu hi Bv-a ziah a ni a, a man a direct nghal bawk a ni. 'Thih leh Dam' film hi February 23, 2024 (Zirtawpni) zan hian Saikuti Hnall, Lunglei leh Vanapa Hall, Aizawl-ahte tlangzarh a ni dawn a, Lersia Play App-ah en theihin a awm bawk ang.