India rama civil mite chawimawina sang Padma Shri chu Mizo folk singer KC Runremsangi hnenah hlan a ni dawn. Mizo zingah rimawi huang atanga Padma Shri dawng hi an la awm ngai lo a, KC Runremsangi hi a hmasa ber tur a ni. Kum 59 mi KC Runremsangi hian kum 2017 khan folk music lama a thawhhlawk hian India President Ram Nath Kovind hnen atangin 'Sangeet Natak Akademi Award' a lo dawng tawh bawk a ni. 

Kum 59 mi KC Runremsangi hi Art (vocals) huanga a thawhhlawk avangin he chawina hi hlan a ni dawn a, Mizo zingah he category-a  Padma Shri dawng hmasa ber a ni tur hi a lawmpui awm hle. Fam ta Pi Lalsangzuali Sailo khan Padma Shri hi a lo dawng tawh a, a dawn chhan hi Literature lama a thawh hlawk vang a ni thung. KC Runremsangi hian Art huangah a dawng ve leh dawn a, Mizo ten bung thar kan kai leh dawn ta a ni. 

Padma Shri a dawn chhan tur tarlan zingah hian rimawi hmanga Mizo folk heritage tihausatu leh humhimtu a nih thu tarlan a ni a, hna ropui tak a thawk tih hai rual a ni lo. 'Queen of Mizo Folk Song' an tih hial KC Ruremsangi hian rimawi khawvelah sulhnu ropui tak a hnutchhiah a, a hnutchhiah mek zel bawk. A hnathawh ropui tak avang hian India rama civil mite hnena hlan thin chawimawina sang leh ngaihhlut hlawh em em mai Padma Shri a dawng tur hi ZALEN chhungkua chuan kan lawmpui tak zet a ni. 

Padma Shri sem hun tur hi hriat a la ni lo a, KC Runremsangai ngei pawh hian a dawn tur thu chauh hi a la hria a ni.