Mizo football khel thiam zinga hriat hlawh tak Sama Hnamte chu Zirtawpni zing khan Ebenezer Hospital-ah thin tha lo vangin a thi a, nimin chhun dar 12:00 khan an chenna in, Kanan Vengah an vui a ni. 

Tun hnaiah khelmual lama a football khel hmuh tur awm tawh lo mah se, kum 10 liam ta kha chuan Mizoram football ngainatu zingah Sama Hnamte hi hrelo kan awm awm love. 

Kum 2002 khan National Sub Junior Championship-ah Mizoram chu 2-na nihpuiin 2003-ah a champion pui a, hemi tum hian best  player-a thlan a ni. 
Ruangamah a palian hran lo, chuti chungin khelmual chhungah erawh a palian hle thung a, hnam dang palian tak tak, amah aia sang fe fe bulah pawh a te ber hauh lo. Mizo footballer zinga talent nei tha ber pawl Sama Hnamte hian a ball thiam leh a timing dik hi a larpui a, khelmual chhunga hruaitu tha tak a ni bawk. 

    India Sub Junior player hi kum 2004 khan England leh Bangladesh-ah a training tawh a, Asian Football Confederation Sub Junior, Japan-a neihah khan India team-ah a tel tawh bawk.     Eng position-ah pawh khel thei Sama Hnamte hi Mizoram tan AIFF hnuaia age group leh senior inelna hrang hrangah vawi tam a inlan a, senior level bikah Santosh Trophy, National Games, Dr TAO NE Football Tournament, NE Sports Festival leh Capt NM Gupta Football Tournament-ah te a khel tawh bawk.