ZALEN, Aug. 29, 2024: Mizo hmeichhe zinga colonel kai thei hmasa ber leh a awmchhun, Dr. Mary Hranngul chu Ningani zing khan Guwahati-ah cancer natna avangin a thi a, naktukah an chenna, Shillong, Meghalaya-ah vui a ni ang.

St Mary's College, Shillong leh Gauhati Medical College & Hospital atanga zir chhuak, Dr Mary hi Assam Rifles-in anmahni puala medical officer (doctor)-a lak hmasak ber a ni.

Dr Mary hi medical officer zinga police gallantry medal dawng thei hmasa ber a ni bawk a. Kum 2012 Republic Day khan Manipur-a hel beihnaa a thawh that avangin khatih laia president, Pratibha Patil-i'n a hlan a ni.

January, 2003 khan Assam Rifles-ah hian commission niin Mizoramah pawh assistant commandant-in a awm tawh a. Manipur bakah Assam leh Nagaland-ah a awm tawh a, a thih lai hian Guwahati-a an hmunpuiah staff officer a ni mek.

An hnam hi Hmar hnam peng a ni.