March 20, 2023; Aizawl ah two wheeler taxi khalh a eizawng Mizo hmeichhia 60 bawr vel an awm mek a, chung zinga a hmasa ber Nubuangi, Dinthar veng, Aizawl chuan taxi a khalh tirh atanga vawiin thlengin, hmeichhia a nih vanga chhaih nawmnah emaw en hranna emaw a la tawk lo tih a sawi.

Mizo hmeichhe zinga two wheeler taxi khalh a eizawng hmasa ber Nubuangi hian kum 2016 November thla atangin taxi a khalh tan a, Dinthar veng, Aizawl ah a fate nen chengin, a taxi khalh chu chhungkaw chawmna atana a hman ber a ni.  

ZALEN zawhna chhangin Nubuangi chuan, kum 2016 chho a taxi a khalh tirhin hmeichhe dang an la awm lo tih a sawi a, hrisel tha pangngai tan chuan a hahthlak loh thu te leh hna nuam tak a nih thu te a sawi.

Mite en danah a tha lo zawng engmah thil tawn a neih ngai loh thu te, fakna lam thu erawh a dawn hnem thu a sawi bawk. 

"Kan society ah chuan hmeichhia te hian mipa te tih theih ang tih theih loh kan nei mang lo a, kan tum a kan taimak chuan ka thei ang ti i la, mipa te ang tho in tih theih kan ngah," a ti.

March ni 17, 2023 khan Govt. T. Romana College-a Women Cell, IQAC leh English Department te chuan an College ah hmeichhia chhuanawm te chawimawina an hlan a. Chung zingah chuan Nubuangi pawh hi chawimawina hlan a ni.