The Punch 10-ah Mizo mipa boxer pathum bakah MC Vankimmawii’n Gargi Chahal hmachhawnin Mizo hmeichhe zinga professional boxing khelh hmasa ber a ni dawn. 

Inrinni zan dar 6:00 atangin Kolkata-ah The Punch 10 professional boxing series tan a ni dawn a, heta inlana Mizo hmeichhe zinga professional boxing khel hmasa ber ni turin NTP Boxing Training Centre-ah Ramhlun South nula, Kimkimi a inpuahchah mek a, The Punch 10 inhnek hnuhnung berah Haryana boxer Chahal nen an innuai ang.

Kum 21 mi, Kimkimi hian nikum khan North East Olympics leh North East Regional Sports-ah Mizoram tan silver medal a la ve ve a, February khan Aizawl District Boxing Association buatsaih Mizoram Fight Night kg 57 semifinal-ah Ruthi Lalhmingthai, Reiek a hneh lo a ni.

A hmaa ding tur, kum 26 mi, Chahal-i hian April khan professional luhchilhin split decision-in Jyoti Shamsher a hneh a, vawi hnih a inlanna tur a ni.

The Punch 10-a inhnek vawi kua awm tur zinga a hmasa berah NT Lalbiakkima’n Thai boxer Kittipong Jareonroy a hmachhawn dawn a, NTP Boxing Training Centre, Chite Veng, Aizawlah ngawrh takin a inbuatsaih mek.

‘Zo Keite’ Biakkima hian December, 2020 khan professional boxing a khel tan a, a inhnek hmasak vawi liah knockout vekin a chak zawn a, IBA intercontinental title a lak hnuah June 18, 2022 khan Dubai-ah WBC Asian Continental Lightflyweight title a chuh a, Jayson Vayson hneh lovin a tlawm a, a inhnek hnuhnun ber a ni.

Kum khat leh thla hnih chuang hnuah hruihrual chhungah a lut leh dawn a, inhnek tam a duh avangin October 2-a tan tur, Tata SK 612 LPS Pro Fight flyweight-ah a tel dawn bawk a ni.

Sete Boxing Academy-ah ngawrh takin F Zoramchhana leh Omega Lalramdina an inbuatsaih mek bawk a, Zirtawpniah Mizo boxer-te hian Kolkata an pan ang.

Cherhlun boxer Zotea hian Bangkok-ah WBA Asia title chuh tawhin a chak zo lo va, March 10 khan LPS Fight Night-ah insiam thar lehin Johan Lalrinpuia, Luangmual Vengthlang a hneh a, professional huanga vawi riat a inhnek tawhah tum nga chakin vawi thum a tlawm a, Pankaj Kumar nen an inhmachhawn dawn a ni.

March 10, LPS Fight Night-ah Dinthar tlangval, kum 20 mi, Omega chuan professional luhchilhin David Laldanmawia, Lunglei a hneh a, vawi hnih a inhnekna turah professional boxing vawi nga khel tawh Gugan Kumar nen an intawng dawn a, amah aia tawn hriat neih tam lakah chak ngei a inringtawk hle a ni.