Aizawl December 13, 2022: December 12, 2022 khan AMC chuan sumdawng thenkhat te chu AMC Licence an neih loh vangin ni 10 chhunga insawifiah tura an tih chungchangah MIMA OB chuan hemi zan hian google meet hmangin emergency meeting an nei. Sumdawng ten AMC Licence an neih lo chhan hi Mizo hnam himna an ngaihtuah avanga in-registered lo tura an tih vang niin thuchhuah an siam.

MIMA OB chuan, "Kan hunpui laia hetianga chawpchilh tak maia sumdawngte a ti chiai hi a ngaithiam thei lo a ni. Sumdawngten AMC Licence an neih loh chhan hi MIMA chuan Mizo hnam himna tur a ngaihtuah avangin, sumdawngte in-register lo tura a tih avanga in-register lo an ni a. Theih tawpin MIMA(sumdawngte) an tang zel dawn a. Sumdawng, AMC in lehkha a pek zawng zawngte pawh tumah in report buai lo turin MIMA chuan a ngenin a hriattir a. MIMA chu a dinna ngaiah dingin, Mizo hnam himna a awm hma chu mizo te AMC-ah in-register lo turin a ti bawk a ni," tiin thuchhuah an siam.

Heng a hnuaia point hrang hrangte hi MIMA in a memberte in register lo tura a tih nachhan a ni. 

1. AMC Licencing Regulations ah hian Mizo hnam himna a awm loh vangin sumdawngte tumah in-register lo turin a ngen a ni. 

2. AMC lamin documents a phut, 'Voters ID(Epic.), Residencial Certificate, passport size photo - 4,' tih te hi India ram khawi hmun atanga pawhin Mizo ni lo, hnamdang pawhin an neih theih vek anih avangin hnamdang tam tak an in register tawh a. Awlsam tein an in register zung zung theih avangin he AMC Licensing hi mizo te himna awm lo leh inchimralna kawng awlsam te nia a hriat avangin hman tlak lohah a ngai a ni. Mi tumah in register lo turin a ngen a ni. 

3. AMC Licensing Regulations-a in register tura documents ngaite hi mi tupawhin a neih kim vek chuan, AMC hian a register lo thiang lo a, chuvangin, hnamdang tam tak an in-register tawh a, sumdawnna thenkhatah chuan Mizo te min chimral tawh reng a ni. Mizo hnam himna tur AMC-in a siam hma chu tumah lo in register lo turin MIMA chuan sumdawng zawng zawng te a ngen a, MIMA chu a dinna ngaiah a la ding reng a ni.

4. AMC Licensing Regulations ah hian Mizo Hnam himna a awm loh avangin, he Regulations siamtha tur hian Mizo zawng zawng, NGO Co-ordination Committee, Mizoram First leh Political Party zawng zawng tan min lakpui turin MIMA chuan a sawm a ni.

5. AMC in tunlaia hma a lakna kawnga, harsatna tawk apiangte chu MIMA ah in report tur a nia, a theih angin MIMA in hma a la zel ang.

AMC Licensing Regulations MIMA in a duh loh avangin Ni 11.2.2014 ah New Market ah a hal a, Ni 17.7.2014 ah duh lohna lantir nan, Aizawl khawpuia dawr zawng zawng khar a ni a. NGO Co-ordination hmalaknain ni 1.8.2014 atangin ni engemaw zat siamtha tura ngenin, AMC pisa kai tur pawh a dang hial tawh a. Tun thlengin AMC Licensing Regulationa hi siamthat pakhat mah a la awm lo. Kan hnam himna leh damna ngaihtuah hmasa turin MIMA chuan AMC chu a ngen a ni.