Aizawl: Zoram Peoples Movement Leader Lalduhoma chuan, "Mizo hnam hrang hrang te hi inlahrang zawng ni lovin inpumkhat zawnga kan kal a ngai a ni," a ti.

Nimina Pang Zirlai Pawl ten Aizawl Central Hall, Venghlui a Fresher’s Social cum Meritorious Students’ Felicitation Programme 2022 a hmanpuina ah he thu hi sawiin Lalduhoma chuan, “Pang hnamte hi Mizoram luah hmasa pawl zinga mi niin an lang a, kan pi leh pute hunlaia an tawng hmanah te, an thu leh hla, tun hnua ‘Tawng Upa’ kan tihah te hian ‘Pang’ tawng te pawh a tel a, hei hian hmanlai chuan kan pi leh pute nen pawh lo khawsaho a, chengho thin an ni tih a tichiang hle a ni," a ti. 

Inpumkhat pawimawhna sawiin, "Zohnahthlak hnam hrang hrangte hi a inthendarh zawnga kan awm chuan tih tham lohah kan chhuak dawn a. Kan vai hian unau vek kan ni a, kan hnam hi ropui taka a dinchhuah theihnan theihtawp kan chhuah a tul a ni," a ti bawk. Pang zirlaite chu theihtawpa zirna kawnga tan la a, eirukna dopuiah sawmin, “Zirna hi ram leh hnam thanlen zelna kawngah a pawimawh em em a, zirna kawngah theihtawp chhuah ula, kawng hrang hranga hlawhtlinna in chan ngei theih nan duhsakna ka hlan che u a ni. Eirukna (Corruption) hi kan ram leh hnam hmelma, min tichhetu a ni a, zirlai lo pungkhawm zawng zawngte eirukna dopui atan ka sawm che u a ni,” a ti bawk. Lalduhoma hian Pang Zirlai Pawl te hi Rs 20,000.00 a hlan a ni.