Zonet buatsaih Mizo Idol Season 7 atan Hunthar nula T. Vanlalhmangaihi chu thlan a ni ta. Mizo Idol 2022 hian lawmman atan pawisa fai cheng nuai hnih (Rs. 2 lakhs) + trophy leh Yamaha Aerox Scooter bakah thil pek eng emaw zat a dawng. Pahnihna chu Saichal nula C. Vanlalroluahtumi a ni a, David Lalchawisanga Darlong chu pathumna a ni. 

Grand Finale-ah hian top 3 te hi an intihsiak leh a, an che tha hlawm vek. Mahse Mizo Idol hi mi pakhat tan chauh a nih avangin a tawpah T. Vanlalhmangaihi hi a ding chang ta a ni. Pahnihna C. Vanlalroluahtumi leh pathuamna David Lalchawisanga Darlong te hian pawisa fai Rs. 1 lakh + trophy leh Rs. 70,000 + trophy bakah thil pek an dawng a ni.

Mizo Idol chu hei le...
Zawl khawpuiin Mizo Idol a neih theih nan Hunthar veng nula T. Vanlalhmangaihi a rawn inlar a, Mizo Idol title kawl mektu Chanmari Veng tlangval Jerry Lalrinawma hnung zuiin Mizo Idol title a rawn hlawh chhuak ve leh ta. 

Hmangaihi hi Mizo Idol Season 7 tan tirh atanga langsar nghal a ni hauh lo a, stage sangah a rawn par chhuak thung. Top 10 atangin mipui hriat a hlawh chho tan a, mahse a lakah rinna nghat ngam lo an la tam zawk hial ang. Mahse top 5 intihsiak a zawh hnuah erawh Mizo Idol tura rinkai zingah a rawn invawrh chho. 

Top 3 atangin Mizo Idol turin mipuiin an hual chho tan a, intihsiak zan khatna a zawh leh meuh kha chuan he Hunthar nula ngei hi rinkai ber a ni tawh - rinhleh tur a awm tawh lo. Grand Finale-ah pawh mipui mitfukna ber a ni tawh a, mi thenkhat phei chuan 'Mizo Idol tur a chiang tawh' an tihial! Rin lawk ang ngeiin Grand Finale-ah pawh a rawn che tha leh a, a tawpah chuan C. Vanlalroluahtumi leh David Lalchawisanga Darlong te khumin Mizo Idol atan puan a ni ta a ni.  

Rimawi tumtute kha le...
Mizo Idol a hlawhtlin theih nana mi pawimawh em em maite chu rimawi tumtute kha an ni. Zaithiamte an duh anga an zai chhuah theih nana mi tangkai em emte an ni a, an hlu tak zet. 

Endiktute 
Mizo te hian rimawi lamah thiamna nei tha tak tak kan nei nual a, chung zingah chuan Mizo Idol endiktute pawh hi a langsar zinga mi an ni ngei ang. Mizo Idol intihsiak chhung zawngin contestant te an vil tha em em a, thurawn pawh an pe tha tawk tih hai rual a ni lo. 
An hriatna leh thiamnate zaimite hmasawn nan an sawi chhuak thin a, hei hi zaimite tan chuan a hlu tak zet a ni - Rinzauva, Robina leh Vari Varte te hi zaimite tan chuan an la hlu dawn chauh a ni. 

Zonet lam hi
Zonet buatsaih a nih tawh chuan stage leh thil dang pawh a pui hle turah mipuiin an beisei thin a, a dik zia kan hmu leh ta. Mizo Idol intihsiak kha a bul atanga a tawp thlengin a fel fai a, Grand Finale phei kha chu pui tak a ni. 

Zaimite tan chuan Mizo Idol stage-a perform kha duhthusam thlen dikna tih hial ngam a ni ta ve ang. Grand Finale-ah khan light leh sound a thain stage pawh an chei nalh hle a, red carpet thlengin a fel fai hle. An stage ngat phei kha chu TV-a a lan dan ai mahin a takah a pui zawk niin a hmuna kalte chuan an sawi cheu.