DOWNLOAD OUR APP

Read latest news on your phone
app-store
Mizo Idol Season 7 : A thiam zual zingah khawpui pawn an tam zawk
Aug 29, 2022

Mizo Idol Season 7 top 20 intihsiak chu Zirtawpni zan khan zawh fel a ni ta a, nizan khan top 10-a tlingte puan a nia result kan hre hman lo. Top 20 atang hian a tha zual mi 10 thlan chhuah leh an ni a, judge te point pek bakah mipui vote hmangin result hi buatsaih a ni. Top 20-ah khan khawpui pawn atangin mi 13 an lang a, hetih lai hian Aizawl khawpui chhung atang chuan mi pasarih chauh an lang thung. 

Mipui vote 
Top 20 intihsiak zan hnihna a zawh rualin mipui ten an tan zawngte vote theihna hun hawn nghal a ni. Mizo Idol Facebook page leh Instagram-a an top 20 hla post leh Zonet Youtube-a an Top 20 zai post te chu LIKE hmanga vote theih a ni - mipui vote hi nimin tlai dar 3:00pm khan a tawp tawh thung. 

Tute nge tla na?
Social media hi lar leh lar loh tehna tha tak a tling tawh a, Mizo Idol contestant zingah pawh social media lama tla na deuh deuh chu an hriat chho tan zel. YouTube lamah chuan David Lalchawisanga Darlong leh Deborah VL Hmangaihi ten boruak an nei lian viau a, top 10 an inhlangkai a nih pawhin a mak lo ang. YouTube bakah hian Facebook leh IG lamah pawh an ni pahnih hi mipui mit fukna an ni chho mek a, contestant dangte pawhin tantu an ngah tih hai rual a ni lo. 
Khawpui pawn an tam zawk!

Zaithiam zawnna ngaihhlut Mizo Idol Season 7 hi District hrang hrangah audition neih a ni a, tel pawh an tam phah hle. A tha zual an thlitfim mi 20 zinga a tam zawk kha khawpui pawn atanga tel an ni - top 10-ah khawi nge tling tam zawk tih chu lo chik rawh u. 

Mizo Idol ni thei hi mi paruk an awm tawh a, chung zinga pakhat chauh chu Aizawl khawpui chhung mi a ni - kuminah pawh hian Aizawl pawn lam ten an hawn leh mai lo'ng maw? Kum 2007 khan Lallawmpuia, Champhai chu Mizo Idol hmasa ber atan thlan a ni a, hemi hnu hian - Lalchhanchhuaha (Sumsuih), Lalthuthaa (Siaha), Grace Lalchhanhimi (Kolasib) leh Rebecca Zorintluangi (Sairang Sihhmui) te chu thlan an lo ni tawh bawk a, an vai hian khawpui pawn mi vek an ni. 

Mizo Idol hnuhnung ber 2018-ah erawh dan rual lohin Aizawl Chanmari veng tlangval Jerry Lalrinawma a rawn invawrh a, a ni chauh hi Aizawl mi Mizo Idol ni thei a la awm - kuminah a hnung zui thei an awm ang em?

Top 10 intihsiak
Nizan-ah top 10 result puan a ni a, tute nge tling kan hre theuh tawhin a rinawm. Top 10 te hian intihsiak hautak an hmachhawn zui leh dawn a, zan hnih an intihsiak leh ang. August 30, Thawhlehni zan leh September 1, Ningani zanahte an intihsiak leh dawn a, Dawrpui Multipurpose Centre-ah a ni ve tawh thung ang. He hmunah hian final thleng intihsiakna hi neih a ni tawh ang - contestant te an tha tlang tawh a, vawi khat chet sual zeuh pawh a pawi hle tawh dawn a ni. 

Mizo Idol lo ni tawh te
2007 - Lallawmpuia, Champhai
2009 - Lalchhanchhuaha, Sumsuih
2011 - Lalthuthaa, Siaha
2013 - Grace Lalchhanhimi, Kolasib
2015 - Rebecca Zorintluangi, Sairang Sihhmui
2018 - Jerry Lalrinawma, Chanmari, Aizawl 

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh