Mizo Idol Season 7 top 5 intihsiak result chu Zirtawpni zan khan puan a ni a, Deborah V.L Hmangaihi, Lunglei Zotlang leh Lalngaihzuali, Zonuam, Aizawl te chu top 3-ah an inhlangkai zo ve ta lo. Hetih lai hian T. Vanlalhmangaihi (Hunthar), David Lalchawisanga Darlong (Tripura) leh C. Vanlalroluahtumi (Saichal) te chu Mizo Idol nih tumin intihsiakah an inlan chhunzawm zel dawn a, tunge Idol ni ta ang le?

Deborah V.L Hmangaihi
Mizo Idol tihlawhtlingtu zinga mi a ni a, mimala lar ber tih ngam a ni hial awm e. Mahse Mizo Idol a zinkawng chu a lo tawp ta a, uitu pawh a ngah tih hai rual a ni lo. Judge zinga mi Robin-a chuan,"Duhtu i ngah ber a, i hlawhtling tawh hrim hrim," tiin a chungchang hi a sawi a, hei hian a dinhmun a sawi chiang viau awm e. Deborah-i hi mipuiten rimawi khwvelah hmuh chhunzawm zel an beisei dawn a, a kal fuh chho a nih ngat chuan Idol te ai pawha lar chhunzawm thei tur chi kha a ni!

Lalngaihzuali
A ni pawh hi theihna sang tak nei a ni a, mi 400 vel atanga a tha zual mi panga an thlan chhuah zinga tel pha a nih avangin dahhniam chi a ni lo. Chutih rual chuan amah hi lar lo tur chi ang kha a ni em aw tih theih a ni a, top 5 hial a thleng chungin mipui hriat a hlawh tawk lo. 

Intihsiak boruak a zo a, zalen takin hun a hmang thei tawh dawn. Hei tak hi rimawi lama a hma hun siam chhoh nan a pawimawh dawn a, tunah chuan a hma hun ama kutah a innghat thui leh zual dawn a ni. 

Top 3 te chu...
Kumin zet chu Mizo Idol tur rin thiam a har khawp mai - T. Vanlalhmangaihi, David Lalchawisanga Darlong leh C. Vanlalroluahtumi te hi an theihna a inang lo hlawm hle a, tu ber hi nge ding chang ang tih pawh sawi lawk thiam harsa tak a ni. Top 3 te hi September 20, Thawhlehni zan hian an intihsiak leh dawn a, hei hi a pawimawh vet vet tawh khawp ang le. 

Intihsiak tawpna leh Grand Finale ni bawk chu September 23, Zirtawpni zanah neih a ni dawn a, Mizo Idol tur a chiang tawh dawn. Hunthar Veng nula T. Vanlalhmangaihi hi a chet fuh chuan Idol ni thei tur khawpa thiam a ni a, David Lalchawisanga Darlong hi mipuiin Idol tura an hual ruk a ni ngei bawk ang. Saichal nula C. Vanlalroluahtumi hi Mizo Idol nih phu ber chu a ni mai lo maw? Karleh Zirtawpni zanah engkim a chiang dawn e.   

Top 3 te hi khawpui chhung, khawpui pawn leh state pawn a mite an ni a, khawnge Mizo Idol hi a haw dawn hriat a chakawm ta hle. Mizo Idol title kawl mektu chu Chanmari tlangval Jerry Lalrinawm a ni a, ani hi Aizawl khawpuiin Idol a neih awm chhun a la ni reng - a bak chu khawpui pawn mite zel an la ni! Kuminah pawh khawpui pawnah a chhuak leh mai ang em, nge state pawnah a chhuak zawk dawn? 

Mizo Idol Top 3 (Finalist) :
C. Vanlalroluahtumi, Saichal
David Lalchawisanga Darlong, Tripura
T. Vanlalhmangaihi, Hunthar