Mizo Idol Season 7 top 10 intihsiak zan khatna chu nizan khan Dawrpui Multipurpose Centre-ah neih a ni a, zaninah chhunzawm a ni ang. Zan khatnaah hian music track hmangin an intihsiak a, zaninah erawh live music hmangin an intihsiak ve thung dawn a ni. 

Top 10 intihsiak zan khatnaah hian contestant-te an che tha hlawm viau a, mipui ngaihven Deborah VL Hmangaihi pawh a zai tha leh pek hle. Mi 400 vel atanga a thiam zual thlan chhuah an nih miau tawh avangin hla thlan thiam a pawimawh a, chet sual zeuh a pawi thui viau tawh bawk. 

Music track hmanga zai thang tak takte an nih hlawm avangin an thiam tlang viau a, live music-ah pawh an intluk tlang leh viau mai thei. Tun dinhmunah chuan Mizo Idol tur rinthiam a la harsa a, live music hmanga an intihsiak leh hnuah a tha chu an rawn invawrh dawr mai thei. Mipui vote a pawimawh leh dawn hle bawk a, zanin intihsiak zawhah mipui vote theihna puan a ni leh ang.

Top 10 result hi September 6 (Thawhlehni) zanah puan a ni dawn a, show hmuhnawm tak a awm dawn bawk a ni. Top 10 atang hian a tha zual mi panga thlan chhuah leh an ni dawn a, live music hmang vekin a tawp thleng an intihsiak tawh dawn a ni. 

Top 5-a tlingte hi September 9, Zirtawpniah an intihsiak ang a, September 13-ah a zan hnihna neih a ni bawk ang. Mizo Idol Season 7 intihsiak hmabak a tam tawh lo a, a hmar an bawk hnai dawn ta reng mai. Tun hma angin ngaihhlut a hlawh tawk tawh lo deuh emaw tih theih a ni a, mipuiah pawh a tlana tawk lo. Tun hma deuh kha chuan TV bak en tur a awm meuh lo a, reality show pawhin ngaihhlut a hlawh thin hle a nih kha.