Mizo Idol Season 7 chu a hmawr bawk a hnai chho zel a, show tam a awm tawh lo. Zirtawpni zan khan top 5 ten intihsiak zan khatna an zo a, September 13, Thawhlehni zanah an intihsiak leh ang. Mizo Idol atan tunge tha ber ang tih inzawt ta ila, chhanna a inang lo thei hlawm viau awm e.  

Thenkhatin David Lalchawisanga Darlong an dah san viau laiin, Deborah V.L Hmangaihi tantu ten an pawmpui kher lo thei thung. Saichal nula C. Vanlalroluahtumi hian a phu ber a lawm ti an awm laiin, T. Lalhmangaihi tantute ve thung chuan Mizo Idol hi Hunthar-ah a haw tur a ni an lo tive tlat thei bawk. He tiang boruak karah hian Zonuam lam pawhin Mizo Idol hi beiseina sang tak nen an lo thir ru ve reng thei bawk - an intihsiak leh anga a chiang chho zel dawn e. 

David Lalchawisanga Darlong (Tripura)
Show tir lamah Mizo Idol-a lo tel tawhte an zai a, intihsiakin a chhunzawm. Tripura atanga lo tel mipui lama tlana em em David Lalchawisanga Darlong a rawn ding chhuak hmasa ber a, Albatross hla hit 'I tel lo chuan' a rawn sa. David-a hi a rawn che tha leh pek hle a, a chesual viau a nih loh chuan Mizo Idol ni thei tur zinga mi a ni - mi thenkhat beisei dan pawh a ni ngei ang. 

Judge te pawhin an fak leh viau a, Vari Varte phei chuan ram chhung mai ni lo ram pawn thleng pawha zahpuiawm lo khawpa theihna nei sang a nih thu a sawi hial. David-a hian lawm a hlawh a, mipui vote pawh a hmu tha thin hle a nih kha. Top 5-a mipa la dam awm chhun a ni bawk a, tan a hlawh chho zelin a rinawm. 

Deborah V.L Hmangaihi (Lunglei Zotlang)
Lunglei Zotlang nula hi he intihsiaka mipui hriat hlawh hmasa ber ti ila kan sawi sual awm lo e. Audition round atangin thawm a rawn nei nghal hat a, a aw nghet leh ngaihno bei tak chuan sang takah a vawrh chho zel. 

Deborah-i hian top 5 intihsiakah hian H. Lalmuankimi hla lar 'Ka hmangaih che a sin' tih chu a rawn thlawh a, nalh leh veng veng tak a ni. Judge te pawhin an fak leh pek viau a, ani hi chu mipuiin a ruka Mizo Idol atana an hual a ni!  

Mizo Idol a lo ni lo palh a nih pawhin a lar zui dawn tih a chiang tawh a, rimawi khawvelah hming a chher chho zelin a rinawm. Kum naupangte atanga zai tui chho a ni a, a aw mawi tak hmangin Zo hnahthlakte min awi zui zel se a duhawm hle. 

C. Vanlalroluahtumi (Saichal)
Judge ten 'Tum-tum-i' an tih thin kha a ni a, mahse tunah chuan VL-i a ni tawh dawn! Saichal nula VL-i hi a zai tha leh pek hle a, a aw pawh a chak tha hle. Ani hian 'Pathian hmangaihna ropui zia' tih hla a rawn sa a, a zai a ngaihnawmin a mood-ah a cheng tha hle.  

Judge ten an fak a, amaha theihna awm an hmuh hmaih lo. A aw nena inmil tur tak hla a rawn sak chhuah avangin judge te fakna a dawng hnem a, Saichal lamah Mizo Idol hi a haw mai lo ang tih pawh sawi huai har tak a ni ta! Saichal mipui ten an khaw nula hi sang tak thleng turin an beisei a, an duhthusam ang ngeiin top 5 hial a inhlangkai ta - an khua hian Mizo Idol an nei thei hlauh a nih chuan an chhuang khawp ang le. 
 
T. Lalhmangaihi (Hunthar, Aizawl)
Hrang hlui zaithiam Laltanpuia Tochhawng hla hit em em mai 'Hmangaihna ka ngen a ni' tih hla a rawn thlang a, a tisual lo chiang hle. Hunthar nula Hmangaihi hi a aw a chak tha hle a, a performance pawh a hmuhnawm sawt hle. Kawng hrang hrangah hma a sawn a, top 5 a  inhlangkai pawh hi a mak lo. 

'Hmangaihna ka ngen a ni' tih hla hi hneh sawh takin a rawn sa chhuak thei a, amahah theihna sang tak a awm tih hai rual a ni lo. Kum naupangte ni chunga 'Ro min rel sak ang che' tih hla thiam taka a lo sak tawh thu judge zinga mi Robin-a'n a sawi a, zai lamah hnuhman a lo nei tha viau tawh a nih hmel. 

Lalngaihzuali (Zonuam, Aizawl)
A tawp berah a rawn zai a, a zai a ngaihnawmin a pui rem rem hle. Zonuam nula Angaihi hian zaithiam thenkhat sak ngam loh tur 'Pathian ropui rawh se' tih hla chu intihsiaknaah a rawn sa hem mai - huaisen takin a theihna a rawn phochuak. Judge te fakna tawngkam a dawng hnem a, a che sual viau a nih loh chuan a tawp thleng thei tur zinga mi a ni. A aw tha lutuk tak mai hi Mizo Idol nih pui tham a tling a, a theihna san zia a pho chhuak zel.   

Zan khat dang an la intihsiak leh dawn avangin che sual palh thei vek an la ni a, an thiam hlawm tawh em avangin hla thlan thiam a pawimawh viau bawk ang. 

Top 5 te leh an hla sak
1. David Lalchawisanga Darlong - I tel lo chuan
2. Deborah V.L Hmangaihi - Ka hmangaih che a sin
3. C. Vanlalroluahtumi - Pathian hmangaihna ropui zia
4.  T. Lalhmangaihi - Hmangaihna ka ngen a ni
5. Lalngaihzuali - Pathian ropui rawh se