A thiam zual mi 10 an la awm a, mahse zaninah mi panga an kiam leh dawn. Top 10 ten zan hnih an intihsiak hnuah zaninah an result an hre dawn a, show hmuhnawm tak en tur a awm bawk ang. 

Mizo Idol Season 7 intihsiak hmawr bawk a hnai tawh a, an inthlifim mek zel bawk. Top 10 te music track leh live music hmangin an intihsiak a, an thiam zia sawi nawn a ngai tawh lo. Zanina tla turte pawh hi thiam tak tak vek an ni a, eng emaw lai chetsual zeuh vang leh an thiante chet that vanga tla turte an ni - intihsiak an ni tlat si. Mizo Idol hi mi pakhat tan chauh a nih avangin an inthlifim chho zel a, mi panga chauhin intihsiak an hmachhawn zui thei dawn a ni. 

Mipuiten vote hmangin an duh zawngte an support thei a, hun erawh a tam tawh lo. Tu pawh top 5-a inhlangkai thei vek an la ni a, tla thei dinhmunah an ding theuh bawk! Zaninah engkim a chiang dawn e.
Zanin hian result puan bakah show hmuhnawm tak en tur a awm dawn a, Zonet Zawlbuk bakah Empai-ahte live-a pekchhuah a ni ang.