Aizawl District Wrestling Association (ADWA) chuan Aizawl Municipal Corporation (AMC) thawhpuiin Aizawl district chhunga a duh apiang tan Mizo inchai a buatsaih dawn.

Aizawl District Invitation tournament-ah hian pa lian leh nu lian, kg 71 chung lam champion zawn a nih dawn bakah, pa laihawl leh nu laihawl, kg 56 atanga 70 inkar leh pa tê leh nu tê, kg 55 hnuai lam champion zawn a ni dawn bawk a, champion-in Rs. 6,000 leh pahnihnain Rs. 3,000 bakah medal an dawng tel ang.

Hei bakah hian mipa leh hmeichhe tan weight hrang pathum ve ve, kg 50 hnuai, kg 51 atanga 60 inkar leh kg 61 chung lam tan inchai pangngai an huaihawt tel dawn a ni.

September 12 atanga 15 chhungin zan tin dar 8-ah zel neih thin a ni dawn a, LPS Vision-in live-in a pe chhuak thin ang.

ADWA hruaitute chuan an huam chhunga inchai talent zawnna pawimawh tak a nih thu an sawi a, a duh apiang tan tel theih tura kawng hawn a nih bakah Mizo inchai tihlarna tur leh wrestling tihnun thar zelna kawnga hma an lakna a nih thu an sawi.

Nikum November khan Mizoram Wrestling Association (MWA) chuan Mizo inchai title fight buatsaihin pa lianah Lalsangliana, Upper Republic; pa laihawlah Remruatpuia, Saitual; pa tê-ah B Lalawmpuia, Thenzawl; nu lianah Lalhmangaihsangi, Dilkhan; nu laihawlah Elizabeth Rohlupuii, Melriat leh nu tê-ah Lalvenhimi, Bethlehem Veng an champion a. A tam ber hi an huam chhunga awm an nih avangin ADWA chuan Mizoramah wrestling hmunpui pawimawh an nih thu an sawi a, an duh phawt chuan Mizoram champion-te an tel thei tih an sawi bawk.

MWA chuan August 1 atang khan Ramhlun Sports Complex Wrestling Hall-ah tlai dar 3:30 atanga dar 5 thlengin a duh apiang tan a thlawnin coaching a huaihawt a, NIS coach F Vanlalsiama’n zirtirin a tam thei ang berin chhawr tangkai se a duh hle.