ZALEN, Dec. 05, 2024: Mahindra XUV3XO Mizo Inchai Title Fight-ah inchai chak 12 an inlan dawn a, Nilaini zan hian LPS Auditorium, Zarkawtah inbukin hmaichhanah an intawng a, chak ngei tura an inbuatsaih thatzia an sawi vek.

Hmeichhe title hrang pathumah mi paruk, mipa title hrang pathumah mi paruk tho an inchai dawn a. Inbuk tan hmain Mizoram Wrestling Association (MWA) President Ngurthansanga chuan, pi leh pute atanga Mizo ngaihsan, Inchai Title Fight en turin mipui a sawm.

Palian:

Lalrinchhana Sailo (champion chotu), North Vanlaiphai leh Lalsangliana (champion lai), Upper Republic an insu dawn.

A chotu zawk, kg 97-a rit, 5’11”-a sang, Rinchhana chuan, “Amah hneh ngei turin theihtawpin ka inbuatsaih a, ka hneh ngei ka ring,” a ti.

A awm inchi 45, kawng inchi 39-a lian, hian Sangliana chu amah aiin Kg 24-in rit zawk mah se a theih chuan chawi kân ngei a tum tih a sawi a. “Ka thianten theihtawpin ka inpuahchahnaah min pui a, a tha thei ang berin ka inpuahchah a, ka hneh ngei ka ring,” a ti.

Champion lai, Upper Republic buan chak, Sangliana hi kg 121-a rit a ni ve thung a, 5’11”-a sang a ni bawk a. “Mizo inchai bikah hian 2014 atangin palianah ka champion tawh a, ka tumpui apiangin hneh hi min tum zel a, mahse, tu’man min la hneh thei lo va, chutiang bawk chu tun tumah pawh a thleng ang,” tiin champion kawnghren hum a tum hle.

A awm inchi 52 leh a kawng inchi 41-a lian chuan, “Pathian zarah hriselna ka nei tha a, ka theihtawpin ka inbuatsaih a, kan inrih hleih deuh bawk a, a kâng awlsam viau ang a, a bet awlsam viau bawk ang,” a ti bawk.

Palaihawl:

Ngursangzuala’n champion lai, Remruatpuia, Bethlehem Vengthlang a cho va, an insu dawn.

Saitual buan chak, kg 78-a rit, 5’7”-a sang chuan, “Cho dan chi kim ka cho a, a theih chuan bawhbeh ka tum ang,” a ti hmiah mai.

Ngura hi a awm inchi 42 leh a kawng inchi 31-a lian a ni.

Champion lai, kg 79-a rit, 5’9”-a sang, Remruatpuia chuan, “Kei pawhin cho chi kimin ka cho tawp a ni mai,” a ti ve bawk.

A awm inchi 41 leh a kawng inchi 31-a lian chuan, “Ka bawhbet ang a, ka chawi kâng bawk ang a, a bawkkhup zawngin ka bawhbet bawk ang a, a chi kimin ka bawhbet ang,” a ti a, a ngam hle.

Pate:

Kg 64-a rit, 5’6”-a sang, Lalchhanhima’n champion lai, B Lalawmpuia a cho va, Saitual khaw mi ve ve an insu dawn.

A awm inchi 39 leh a kawng inchi 29-a lian Chhanhima chuan, “Lalawmpuia hneh tur hian ka inbuatsaih tha tawk a, ka fit tha tawkin ka hria,” a ti.

Chhanhima hian Title Fight hnuhnung ber, 2022 khan Awmpuia hi a lo hneh lo tawh a, “Kum 2004 atangin inchai ka khel tawh a, ka tiatpuiah Mizoram chhunga mi tute mahin min bawhbet ngai lo a, ani hi min bawhbettu awm chhun a nia. A bet let ve ngei ang tih ka sawi duh a ni,” tiin phuba lak a tum.

Kg 60-a rit, 5’5”-a sang, Awmpuia chuan, “Ka bawhbeh zat tur ka sawi lo ang a; mahse, champion kawnghren hi chu ka kutah a awm zel dawn,” a ti a. Ani hi a awm inchi 38 leh a kawng inchi 33-a lian a ni.

Nulian:

Lunglei buan chak, Zodinpuii’n champion lai, Hmangaihsangi kut atanga kawnghren chhuhsak tumin a cho.

Kg 72-a rit, 5’4”-a sang, Zodinpuii chuan, “(Lunglei district-ah) champion kawnghren hawn ka tum a. Keimah hi ka inringtawk a, champion ngei ka tum angin ka theihtawpin ka inbuatsaih a ni,” a ti.

“Champion lai lakah hian point 10 hmuh theihna awm theiah a vaiin hmuh ka tum a ni,” tiin a awm inchi 38 leh a kawng inchi 32-a lian buan chak chuan a sawi bawk.

Dilkhan buan chak, Hmangaihsangi hi kg 83-a rit, 5’3”-a sang a ni ve thung a, “Nulian title hi vawi khat ka humhim tawh a. Zingah ka taksa tichaka fei turin ka inbuatsaih a, tlaiah Ramhlun Wrestling Hall-ah inchaiin ka inpuahchah bawk. A bet dawn a, a bawkkhup zawng te, ka lam hawitein a bet ang,” tiin a sawi.

Champion lai hi a awm inchi 43 leh a kawng inchi 37-a lian niin amah chotu hneh a inring hle.

Nulaihawl:

Champion lai, kg 65-a rit, 5’2”-a sang, Elizabeth Rohlupuii, Melriat leh amah chotu, Penticost Lawmsangpuii an inhmachhawn dawn.

A awm inchi 37 leh a kawng inchi 31-a lian, Elizabeth-i chuan, “Round zawng zawngah bawhbeh ka tum a, champion kawnghren hi ka humhim ang,” a ti.

Champhai buan chak, Penticost-i hi champion lai nen san zawngah inchenin kg 69 a ni a, a rit zawk hret a. A awm inchi 40 leh a kawng inchi 32 a ni a. “Ka cho a, bawhbeh ka tum a, ka bawhbeh zat tur chu ka hre lo,” a ti.

Nute:

Kolasib buan chak, kg 52-a rit, 5’1”-a sang, Lalnunsangi’n champion lai, Lalvenhimi, Bethlehem a cho va, an inbuan dawn.

A awm inchi 35 leh a kawng inchi 28-a lian Nunsangi chuan, “Nikum hmasa (Title Fight hnuhnung berah) khan ka hneh tawh lo va, kuminah chuan champion nih ka tum a ni,” a ti a. “Theihtawpin champion ngei turin ka inbuatsaih a, hlauhna ka nei lo,” tiin kawnghren chhuhsak ngei a tum.

Champion lai, kg 54-a rit, 5’1”-a sang, Venhimi pawhin, “Pathian zarah hriselna tha ka nei a, ka chhungten min thlawp tha bawk a; engkimah theihtawp ka chhuah bawk a, ka hneh nawn leh nawn loh chu a hunah a hriat mai ang,” a ti.

Bethlehem buan chak hi a awm inchi 33 leh a kawng inchi 29-a lian niin amah chotu aiin a awm a te hret a, a kawng a lian zawk hret ve thung.