ZALEN January 19, 2025 : Mizorama mahni intihlum (suicide) zingah hmeichhia aiin mipa an tam zawk a. Kum thum kalta - 2021, 2022 leh 2023 chhung khan Mizoramah mahni intihlum hi mi 271 an awm.

Economics & Statistics department-in December, 2024-a an tihchhuah, Statistical Abstract Mizoram, 2023-a tar lan a nih danin kum 2021 khan Mizoramah mahni intihlum mi 65 awmin heng zinga 57 hi mipa an ni a, hmeichhia intihlum pariat an awm bawk.

Kum 2021-a mahni intihlum hi mi nuai khat zelah 4.79 anga chhut a ni a. Mipa intihlum hi mi nuai khat zelah 8.48 anga chhut a niin hmeichhia hi 1.17 anga chhut a ni.

Kum 2022 khan Mizoramah mahni intihlum mi 125 awmin an zinga 104 chu mipa an ni a, hmeichhia intihlum 21 an awm bawk a. Hemi kuma mahni intihlum hi mi nuai khat zelah pakua anga chhut niin mipa intihlum hi mi nuai khat zelah 15.13 anga chhut a niin hmeichhia hi 2.99 anga chhut a ni.

Kum 2023 khan Mizoramah mahni intihlum 81 awmin an zinga 67 hi mipa niin hmeichhia 14 an awm bawk a. Hemi kuma mahni intihlum hi mi nuai khat zelah 5.73 anga chhut a ni a, mipa intihlum hi mi nuai khat zelah 9.60 niin hmeichhia hi 1.95 a ni bawk.