Aizawl September 9, 2024 : Joint Commitee (VC & All NGO), Sairang chuan September 7, 2024-a Sairang khawchhunga thil thleng chungchangah Joint Meeting an nei a, hetiang hian thuchhuah siam. Zanin September 9, 2024 zan dar 12:00 - Nilaini zan dar 12.00 thleng hnamdang khawchhunga awmte pawnchhuah an khap.

Sairang lama atanga thudawn danin hetianga hnamdang pawnchhuah an khap chhan hi hnamdangin khawtualmi laka an chet dan hi an rilru a nat em avangin Khawtual mite an thinrim avanga hmalakna tha lo zawk a thlen an hlauh vang niin thu dawn a ni.

THUCHHUAH

Sairang Tlangval thenkhatten Railway hnathawkte tana harsatna an siam sak hin hi pawi kan ti a, rukruk leh pawi khawihna thlentute chungah dan ang taka action lak a nih zel hi kan duh dan a ni a, thil tisualtu lamah hian khawtlang hi tan a tum lo va, kan tang dawn hek lo.

Chutihrualin pawi khawihtute chungah dan ang taka action lak theih a nih lai a, hnamdang (vai) hnathawkten mihring mihrinna zah lo leh hmuhsitna lam hawi zawnga Sairang tlangval kan khaw tualah ngei kut an thlak ta mai hi pawi kan ti a, he pawi khawihna hian Sairang min tihmualpho mai bakah Mizoram mipui min hmuhsitnaah kan ngai a ni. He thil thlennaa pawi khawihtute zawng zawng hrem an nih theihna turin Joint Committee chuan thuneitute a phut tlat a ni.

Tin, tun hnuah hetiang hi vawi khat mah a thlen tawh lohna tur te, hnamdang Sairang leh a vela awmten kan ṭhalaite kut palh an tawrh lohna tur leh an him zawk nan ni 10 (Thawhlehni) & 11 (Nilaini) September, 2024 (Zanin dar 12:00 - Nilaini zan dar 12.00) chhung hian hnamdang khawchhunga awmte leh hnathawkte pawn chhuah khap a ni a, hnamdang dawrkaite pawh dawr khar vek tur a hriattir an ni.

Hetiang pawi khawihna thlen lai video lo la a, mimal leh khawtlang mualpho theihna tura hma lo latu hi Joint Committee chuan kan dem hle a, hetiang hi thleng nawn tawh lo se kan ti a ni.

Joint Committee thuchhuak hi hnamdangten Mizoram hi zofate ta a ni tih an hriat a, an duh ang anga che leh khawsa thei an nih lohzia an hriatna tura tih a ni a, khawtlang mipuite he hmalakna hi ṭha taka zawm turin kan insawm a, tharum thawhna lam hawi zawnga che chhuak lo turin kan inngen a ni.

H.LALDINGLIANA

VCP, Sairang

C. SANGROTLUANGA

President, Sairang Branch YMA

C. LALMUANPUII

President, MHIP Sairang Branch

ISRAEL SAITHANTLUANGA

President, MZP Sub-Headquarters , Sairang

PC NEIHṬHUAMA

Secretary, MUP Sairang