Aizawl; Mizo lalte rorelna chelhtu zinga la dam awmchhun nia hriat, Lalrokhama chu kum 91 mi Inrinni zing dar 12:10 Zirtawpni zanlai) khan a chenna hmun, Vaphai khuaah a boral. Vaphai Ex-chief Lalrokhama hi, Thatinchhuma fapa niin, kum 1923 November ni 17-ah piangin, pianpui unau mipa 3 leh hmeichhia 1 a nei. Kum 1942-ah Khuangleng Lal Vaihleia fanu Kapmawii nen inneiin, fa mipa 4 leh hmeichhia 7 an nei. Kum 1996 khan a nupui Kapmawii’n a boralsan tawh a, tu 34 leh tuchhuan 37 a nei. Kum 11 mi chauh anihin (1937) a pa in a boral san a, a pa aiawh turin Lal nihna chu a hminga dah a ni. Upa min pahnih leh Khawnbawl Upa 4 ro relpuiin, rorelna a kuta dah a nih atangin Mizo Lal ban thleng (1937-1954, kum 17 chhung) ro a rel a ni. Mi fing leh fel, rorel thiam tak a nih bakah pasaltha, ram vachal a ni a, sa 205 a kap. Mizo Lal ban an nih hnu-a Village Council inthlan tum hnihna atangin Vaphai VCP hna a chelh chho leh a, term 5 (kum 15) chhung VCP a ni. Indopui 2-naah ‘V- Force’ Pasaltha'B'ah tangin Champhai leh Vaphai inkar a awp thin a. A hnathawh that leh rorel thiam vangin British sorkarin chawimawi nan Laiphir (DBBL) a pe hial a ni. Zirna lamah Lalrokhama hi Vaphai khuaa lehkha thiam hmasa a ni a, Lower passed hmasa ber a ni. Hriatrengna tha tak a nei a, thil chhinchhiah a peih hle bawk. Dairy pawh Sept. ni 11, 2014 thleng khan a la ziak a ni. A ruang hi Vaphai khawtlang chuan Mizo LAL te zinga tlangchang la dam zinga mi a nih a vang leh chawimawina lantir nan a lu men an dil a, a chhungte pawhin remtiin, vawiin chawhma dar 10 hian Vaphai-ah vuiliam a ni ang.