February 22, 2024; CMC Vellore Mizo Association leh CMC Mizo Welfare chuan, February Ni 18, 2024 khan Aizawl atanga Vellore a in check up a kal tur, Vellore lama damlo hruaia awm mek Mizo vekin damdawi anga a chah chu heroin tih hriatchhuah a ni tih thuchhuah siamin an tarlang.

He thil thleng chungchang hi CMC Vellore Mizo Assocition leh Vellore Mizo Welfare chuan pawi an ti hle tih an tarlang a, dam lohna avanga Vellore kal thinte hnam dang kara inenkawl an nih thu te, hun lo kal zel turah hnam dangten hetiang zawnga min hmel hriat tur hi an ngai ngam lo va, hetiang hi thleng nawn tawh lo se an duh tih an tarlang.

"Dam lohna avanga Vellore kal thin leh la kal zel turte pawhin mi thil thawn kan ken hmain eng thil nge kan kensak dawn tih finfiah hmasa thin turin kan inchah nghal a ni," an ti.

Tunhnaiah Vellore tualchhung mite atangin Mizote zingah zu in thin, mi dang tana hnawksak an awm thu complain an dawng tih tarlang bawkin, Vellore-a kal thinte leh la kal zel turte pawh kan Mizo hming tichhe zawnga khawsa lo hram turin an ngen bawk.