ZALEN November 19, 2023 : Mizoramah kum khat chhunga mitthi chhinchhiah 8,101 an awm a, chung zinga 5,156 chu mipa niin, mipa thi zat leh hmeichhe thi zat inthlauhna a tam hle a. Kum bithliah hrang hrang zingah kum 70 chung lam thi an tam ber. Mizoram sawrkara Economic & Statistic Department-in tun hnaia a tihchhuah, Statistical Handbook- 2022-a tar lan a nih danin kum khat chhunga mitthi chhinchhiah zawng zawng zingah mipa 5,156 an nih laiin hmeichhe thi chhinchhiah zat chu 2,945 an ni a, an inthlauhna 2,211 zet a tling. Kum bithliah hrang hrang zingah kum 70 chung lam thi an tam ber a, mitthi chhinchhiah zawng zawng atangin 32.87% an tling a. Kum 55-64 inkarin dawtin 14.43% an tling a, kum 35-44 inkar 13.50% an tling bawk. Kum bithliah then hrang hrangah kum khat hnuai lam te, kum khat atanga kum li inkarah te, kum nga leh 14 inkarah te mipa leh hmeichhe thi an inzat deuh tlangpui a, kum 15 leh 24 inkarah mipa thi zat 177 an nih laiin, hmeichhia 75 an thi a, kum 25 leh 34 inkarah mipa 455 leh hmeichhia 169 thi an awm. Kum 35-44 inkarah mipa 820 thi an awm laiin hmeichhia 274 an awm a, kum 45 leh 54 inkarah mipa 743 leh hmeichhia 309 thi an awm. Kum 56 leh 64-ah mipa 797 leh hmeichhia 372 an awm a, kum 65 leh 69 inkarah mipa 324 leh hmeichhia 245, kum 70 chung lamah mipa 1,485 leh hmeichhia 1,178 thi chhinchhiah an awm.