A thupui en chunga a chhung thuin a kawh tum hriat nghal theih a nih avangin, mipa tamtak te chuan an chhiar leh dawn lo tih hre mah ila, ziah ngei ngai nia ka hriat miau avangin, thiam leh thiam lovin ka tawngkam thiam zawng zawng sawm khawma ka khawr pum a lo ngai leh tlat si a.
Tun lai thalaite/Mizo mipa rilru sukthlek kan sawi dawn chuan tun lai khawvel changkanna milin kan thlir lo thei lo va, hun liam tawh a, kan sukthlek atanga inteh ngawt theih a ni tawh si lo va, tun hun zel hi a pawimawh miau avangin hmana Mizo tlangval taima, tlawmngai, midangte tanpui hreh lo nunah khan sawitur avang viau awm e. Khang hun liam tawh a Mizo tlangval taihmakna, tlawmngaihna te kha a thu bakin kan chhawm thei tawh lo va, chutih rual erawh chuan khatiang chiah khan tun lai Mizo mipa, thalaite hian kan ti thei a ni tih hi kan hriat thar ava tul tehlul em.
Tuthlawh leh Chempui era a liama tun hmaa khawvel letliama changkanna kan tih mai \hin khan kan tapchhak zawlah min lo luhchilh ve ta, he changkanna hi khualtha thlena lo thlen mai hi a tawk viau laiin ar kan lo talh a, kan neih bak pawh puk chawpin kan lo thleng kher thin hian kan ram thalaite min eichhia ang tih ava hlauhawm tehlul em! Changkanna hian Mipa chauh min luhchilh tihna chu a ni hauh lo va, tun tumah erawh hmeichhe lam sawitel chiam hi a fuh ber lo va, mipa bik hi malkhalh tham kan tling tawh a, kan insiamthat a, khual tha dawnsawn dan kan inzirtir thar a pawimawh hle mai.
He khawvel changkanna hian kan ni tin hnathawhte tiawlsamin remchang viau thin mah se, thil thenkhat hi chuan kan tana tha lo hi a lo chhawm tel ve tlat thin a, chung zingah chuan ruihhlo hi a lar ber leh kan buan hneh loh ber pawh a ni hial awm e. Tin, chubakah chuan he khawvel changkanna in alo ken thil thenkhat hian kan zungzamah min luhchilhin thatchhiatna khurah min hnuk lut leh thin hi a pawi ber lai chu a ni ta.
Mi fel leh mi tha chu tam tak awm mah se, a fel lo avangin kan ramah fahrah an tam phah a, chhungkaw ration card-a hming inziakah chhungkaw hotu ber mipa hming chuang lo va, hmeichhe hming tam tak a chuan phah tawh a, heng zawng zawng hi Mizo mipa te kan ngaihtuahna a thui tawk loh vang a ni thei angem? Sawrkar hmasa in zu a zuara kum nga pawh pumhlum lo a zawrh chhung khan Mizo mipa martar pui kan va tam hman em? Kum 2015-2018 chhunga Mizo mipa ram leh hnam tana martar chu kut tang thliaka chhiar tham leka an ni.
Kan chhungkaw tana kan sen phal loh, kan Pathian ram Ip-a kan thun phal loh, chawhmeh leinana kan hman phal loh kan thawh chhuah bak leh chhungte thawhchhuah sain zu kan leia zu kan in avanga thi chu a sang tel kan tling leh lawi si, thihna thuah kan sawi theih tam lo mah se, thenkhatte hi chuan buan hneh loh an neih avanga Bible pawhin kan dam chen tura a sawi kum chanve awrh dama muallian hi kan va tam tawh si em.
A hming chauh a mipa, inchhung leh fate pawh ngaihsak lo, chhungkhat tlangval ni chunga zing thawh bak hnathawh neih tum lo, mahnia thawhchhuah neih tum lova chhungte thawhchhuahsa hman ralna zawng char char hi kan tam tawh lutuk deuh lo maw? Mizo mipa te kan rilru sukthlek hi kan thlak danglam ava hun tawh em.
Ei leh in tui tha tha kan duh a; mahse, bazara buhfai 1 kg. man pawh hre lo Mizo mipa hi kan tam tawh lutuk, mobile phone-a ral do hero ni thei te hi mahni inchhungah kan zero leh tlat si a. Hetiang te chuan kan ramah hian pasaltha kan sawi apiangin mipa hming ri tur a awm thei nang. Hawhteh u, kan hero nihna hmun hi Mizo mipa te hian thlak ngam ang u. Mipa te hetianga kan khawsak reng chuan Mizo hmeichhia te hian Mizo mipa hnathawhna thawmhnaw bal leh thlan rim nam suk tur an hmu lo mai dawn a sin!
Tuna kan dinhmun hi thlir teh u, social media kaltlangin Mizo hmeichhe dangnal thenkhatin ‘Mizo mipa pasala neih tur ka hmu lo’ tih thu an post vangin kan pawr viau a ni lawm ni? Mizo hmeichhia te innghah ngamna tlakin kan nun hi buatsaih teh ang u. Tlem lai deuh khan kan nula ram danga hnathawk te social media kaltlangin Mizo mipaten ngaihzawn kan ching a ni awm a, a tawng duh deuh nula thenkhatte sawi danin Mizo mipa te hian kan pawisa thawhchhuah bak beisei an nei lo an ti a, kha thu te kha a dik tak tak a nih chuan kan ramah hian Mizo mipa rilru chawisan hi chhungkuaah bultan thain sawrkar hial inrawlhna chi a ni hial tawh lo maw?
Mipa zawng zawng erawh an thatchhe vek lo va, taima lo leh a hlimhlawp zawnga khawsa, hnathawh aia midangte thawhchhuah sa ring duh kan tam a, chhungkaw chawmtu nih tum aiin pasal fanau chawm theitu tur kan zawng tawh a, heti chung hian hmeichhia leh palchhia chu an thlak ngai e tiin tawngkam kan la duhtui lo em em a, Mizo hmeichhia te hian hetiang hian tawngkam nei ta se, kan ner nasa viau lo maw?
Kum zabi sawmhnih pakhatnaah hian Mizo mipa te hian kan rilru sukthlek thlak danglamin kan bawhtur chin hria ila, inchhungkhura kan tihtur te, eizawnna kawnga mipa mawhphurhna te hretharin kan rilru puthmangin hi a tha lam hawiin thlak danglam teh ang u. Kan rilru puthmang hi kan thlak danglam a ngai a, mipa te hian keimahniin kan rilru sukthlek hi thlakdanglam kan tum tur a ni. A hniam lam zawng ni lovin kan rilru puthmang hi kan thlakdanglam ava hun tawh em.