ZALEN November 24, 2024 : Mizoram Presbyterian Church hnuaia Synod Social Front-in zirchianna an neihah Mizo mipate thihna thlentu tam ber chu zu a ni tih an hmu chhuak.

Kum 2022-a Synod Inkhawmpuiah ‘Mizo mipa thi rate sang mek a ziaawm theih nan Synod-in hma la rawh se’ tih thu kal zelah Synod Social Front hian thla ruk (January, 2023 atanga June, 2023) chhunga mipa thihna hi an zirchiang a. Aizawl khawpui chhunga kohhran leh district khawpuia kohhran 256-ah zawhna thawn chhuakin heng kohhranho atanga chhanna an dawnah Mizo mipa thihna thlentu tam ber chu zu a ni tih an hmu chhuak.

Synod Social Front chhanna dawn atanga a lan danin thla ruk chhung hian kohhran 256-ah hian mipa thi 1,249 an awm a. Kum bithliah lova thih chhan tam ber hi zu niin natna dang vanga thi chu pahnihna a ni a, zuk leh hmuam vanga thi leh drugs vanga thi ten an dawt a ni.

Zirchianna tar lan danin thi zinga 798 (63.89%) hi kum 15-59 inkar (eizawn nana hna thawk tura ngaih) an ni a, 432 (34.59%) hi kum 60 leh a chung lam (eizawn nana hna thawk lo tura ngaih) niin 19 (1.52%) hi kum 14 hnuai lam (eizawn nana hna thawk lo tura ngaih) te an ni.

Kum bithliaha thih chhan tam berah chuan kum 14 hnuai lamah natna dang niin kum 15-59 inkarah zu a ni a, drugs, natna dang leh zuk leh hmuamin a dawt a. Kum 60 chung lamah natna dang, zu, zuk leh hmuam leh drugs-in a dawt bawk a. A khaikhawmnaah zu hi mipa thihna thlentu tam ber a ni.

Zirchianna tar lan danin January - June, 2023 chhung hian zu vanga thi 663, drugs thihpui 145, zuk leh hmuam vanga thi 170 leh natna dang vanga thi 271 an awm a. Thla ruk chhunga thi 1,249 atanga chhutin zu vanga thi 663 hi thi zawng zawng zatva aia tam, 53.08% an tling a. Drugs vanga thi 11.61%, zuk leh hmuam 13.61% leh natna dang vanga thi 21.70% an awm a ni.

Zirchianna neih hun chhung hian kum 14 hnuai lam zu vanga thi an awm lo va, kum 15-59 inkar zu vanga thi hi mi 532 leh kum 60 chung lam zu vanga thi 131 an awm a ni.

1. Synod Social Front hian thihna thleng zirchiangtu tur mi pathum a ruat a, heng mite hian mi thiam pathum dang phungbawma sawmin thihna thleng hi an zirchiang a ni.

2. Economics & Statistics department-in kum tina an tihchhuah, ‘Annual report of registration of births & deaths Mizoram 2023' tarlan danin nikum chhung khan Mizoramah nau piang 27,180 awmin heng zinga a tam zawk 14,071 chu mipa niin hmeichhia 13,109 an awm a. Mitthi 9,037 awmin a tam zawk 5,877 chu mipa niin hmeichhe thi 3,160 an awm bawk.

3. Mizorama kohhran lian zual 10 inchhiarna (2021-2022) atanga a lan danin UPC (Mizoram) leh Seventhday Adventist kohhranah chiah mipa an tam zawk a. A bak zawng Presbyterian, Baptist, Savation Army, UPC (NEI), ECM, LIKBK, Catholic leh IKK-ah chuan hmeichhia an tam vek a ni.

4. Mi thiamte chuan mipa thi an tam zel chuan hnam tan a pawi thei hle dawn niin an sawi.