ZALEN November 27, 2023 : Vawiin khan Lalruatkima, Aizawl West II bialtu MLA chuan Tuikual South MHIP Building MLA Fund ₹551934/- leh Dy. Mayor .R Thanglura fund hmanga sak chu a hawng. Hawnna inkhawm hi H Lalawmpuii, Tuikual South MHIP President-in a kaihruai a ni.

Lalruatkima chuan MHIP, Tuikual South-in duhsak taka an Building an hawn tir chu lawmawm a tih thu a sawi a. "Mizoram-ah NGO tha tak tak kan nei a, sawrkar leh kohhrante nen NGO hi tangtlangin Zoram tan an tangkai takzet a. Heng lungthu pathum avang hian kan ram leh hnam leh sakhua pawhin a him phah a, hripui len lai pawhin an tanrual that zarah kan damkhawchhuak thei a ni," a ti.

Ruatkima chuan, "Chhungkuaa dinhmun pawimawh tak chelhtu chu hmeichhia an ni a. Tunlai hian hmeichhia leh mipa kan in tam hleih ta hle a. Death rate en pawhin mipa kan thi nasa em em mai a, hei hi a pawi tak zet a ni. Kan hriselna lam thuah pawh Mizo mipate kan inenkawl uluk lehzual a ngai hle a ni," a ti.

Lalruatkima chuan, "Eizawnna leh sumdawnna lamah pawh Mizo hmeichhiate indaih zai ta hle a. Khawiah nge Mizo mipa kan awm tak? tih tur hial a ni ta a ni. Mizo mipate'n chak lo zawka kan ngaih hmeichhiate atang hian kawng hrang hrangin zir tur kan ngah a. Taihmakna, tumruhna, teirei peihna leh kawng hrang hranga Mizo mipaten hmeichhiate kan entawn a ngai ta hial zawkin a lang a ni," a ti.