Aizawl: Mizoram BJP chuan Inrinni khan an pisa-ah thuthar thehdarhtute an kawm a, kum 2018-2019 atana Mizoram budget chu Mipuite bum tumna nia a lan thu sawiin, “Budget-ah hian Mizo mipuite harsatna leh mamawh sutkian tumna a awm lo,” an ti. BJP general secretary Vanlalhmuaka chuan budget chu mipuite ta, mipuite sum a nih thu sawiin, “Budget hi inthlan kum a nih avanga sawrkarna chelhtu Chief Minister leh a hote sum siamna budget, mipuite vote lei tumna budget-ah kan ngai a. NEDP atana cheng vbc. 1000 hi eng atana hman tur nge? A hmanna lam tur an siam dan en phei chuan mipui chan tur a awm lo hrim hrim tluk a ni,” a ti. Vanlalhmuaka chuan budget chu Lal Thanhawla leh a chhungte nawm chenna tur budget a nih thu sawiin, “Kan ram chhung hmun tinah kawng a chhia a, thalaite tan hnathawh tur siamna kawngah hmalakna tha hmuh tur a awm lo a, hmasawnna lam leh ram leh hnam rotling siam tumna lam pawh a lang lo a ni,” a ti bawk. NLUP Implementing Board (NIB)-in February 9, 2018-a Congress MLA-te chauh NLUP dawng tur an bial chhunga mi 400 thlang tura an ti chuan NLUP chu sawrkar flagship programme ni lovin Lal Thanhawla leh a hote sum siamna a ni tih a tilang chiang niin a sawi bawk.