Mizoram MMA fighter-ten India ram pum inelna sangah hlawhtlinna ropui changin gold medal pathum leh silver medal pakhat an hawn a, fighter pahnihin best performance award an dawng bawk.

May 18-21, 2023 chhunga Lucknow, Uttar Pradesh-a 6th MMA India National Mixed Martial Arts Championship khelh zawh takah Mizoram aiawha turin Mizoram State MMA Association (MISMA) chuan fighter pariat a tir a, medal pali an hawn a ni.

Nazareth Lalthazuala s/o Lalhratthanga, Zemabawk Kananthar veng (Flyweight), Zarmawia s/o Lalramnghinglova, Chite Veng (Featherweight) leh David Lalmalsawma s/o Lalhriatpuia, Kulikawn (Lightweight) ten gold medal lain Lalnunmawia s/o Lalthanzama, Tlangnuam Vengthar (Lightweight)-in silver medal a la bawk. 

An zingah hian Zarmawia leh Nazareth-a te chuan best performance award (MMA glove) an dawng bawk.

Mizo fighter-te hi Thawhtanni chawhnu khan Aizawl an lo thleng leh tawh a ni. 

National record siamtu Zarmawia
Zarmawia hi Featherweight (-65.8 kgs)-a a champion leh avangin India ramah record a siam ta a. National championship-ah weight pathum - Welterweigt (-77 kgs), Lightweight (-70kgs) leh Featherweight (-65.8 kgs)-a champion thei awm chhun a ni. 

National championship vawi nga leh national open vawi riat vel lo neih tawhah hmarchhak mi zingah gold medal la thei awmchhun chu Zarmawia chiah hi a la ni bawk.

Tun tum tournament-ah hian a record a that vangin round of 16 a awl (bye) nghe nghe a, quarterfinal leh semifinal chu technical knockout-in a chak a, final-ah fighter tha, Brazil-ah pawh lo training tawh, BJJ Purple belt Karnataka mi chu unanimous decision-a hnehin gold medal a la ni.

Nazareth-a pawh a nep lo
Nazareth-a ve thung hi round of 16-ah submission (armbar)-in a chak a, quarterfinal leh semifinal-ah technical knockout-a chak lehin final-ah India rama tha ber, national-ah pawh vawi tam tak champion tawh leh Asian Championship-a bronze medalist ni lai, Tamil Nadu mi chu unanimous decision-in a hneh a ni.

Final-ah Mizo inhmachhawn
Lightweight-ah hian final-ah Mizo tlangval pahnih, David-a leh Mawia an inhmachhawn a, David-a a vannei ta zawk.

David-a hi round of 16 leh quarterfinal-ah technical knockout-in a chak a, semifinal-ah knockout-in a chak leh a, final a lut.

Pool lehlamah Mawia a awm ve thung a, round of 16-ah knockout-a chakin quarterfinal-ah submission (armbar)-in a chak leh a, semifinal-ah technical knockout-in a chak leh bawk.

Final-ah Mizo fighter pahnihin an innuai a ngai ta a, inhnehtawk viauvin split decision-in David-a hi a chak ta a ni.

Engnge an sawi?
MISMA Technical Chairman Samuel Lalrozama chuan Mizo fighter-ten hma an sawn tawh thu leh gold medallist-te phei chu professional fighter ni ngei turin an pawlin hma an lakpui tur thu a sawi.

“Zara leh Mawia te hi Muaythai background niin Nazareth leh David te hi Kickboxing background an ni thung a, an standing skill neih sa bakah theihtawpa ground game (Brazilian Jiu-jitsu) an zir rah an seng a ni,” a ti. 

MISMA President Jeremy L. Pautu chuan ram pum huap inelnaa kal tura nasa taka an naute training petu, an hnuaia club pahnih, SPES Gym (Dawrpui Contact Sports) leh HBK Gym chungah lawmthu a sawi a, sorkarin an kalna leh senso mamawh a tumsak avangin Chief Minister Zoramthanga leh Sports Minister Robert Romawia Royte chungah lawmthu a sawi bawk. 

National record siamtu, Zarmawia hi anmahni bialtu MLA, sports minister ni bawk hian a personal training fee a tumsak mek nghe nghe.

Inelna kalhmang
6th MMA India National Mixed Martial Arts Championship-ah hian International MMA Federation dan angin Amateur MMA pangngai bakah kum 17-21 inkar leh Youth A, B leh C (kum 10-17 inkar) inelna buatsaih a ni a. MMA cage pawh pathum hman a nih bakah open mat (Tatami) pahnih hman tel a ni bawk.

Senior amateur tournament bikah hian India ramah inelna a sang tawh a, fighter pawh an thain hma an sawn nasa hle bawk. 

Tun tum inelnaah hian weight khatah state khat atangin pahnih tel phal a ni a, a pum puiah Chhatisgargh chuan gold medal 16 lain team champion an ni a, Maharashtra-in medal 15 lain an dawt.