ZALEN November 3, 2023 : MNF Media & Publicity General Secretary VL Krosshnehzova chuan, "MLA Inthlan 2023 kan hnaih ta hle a, Party tin ten kan phak tawk theuhin Campaign rusum kan thlak chho a, a vawrtawp a thleng chho ta mek a ni. MNF chuan he inthlanpuia hnehna chang tura inbeihna kal chho mek chu Mizo Nationalism leh Lal hrim hrim chakna a tuihal te inbeihna boruak lian berah kan ngai a ni," a ti.

Zotea chuan, "ZPM ten a thuammawi nan ‘Kalphung thar, Mipui Sawrkar’ tiin, sawi mawi teh tum mah se, Sakhi ngalah a vun chauhin a ruh a tuam angin a chhunga inphumru lian ber chu Lal hrim hrim chakna avanga tuihal aw chauh a ni ah kan ngai a, an kalphung thar zawrh mek chu an MLA neih chhun leh Independent MLA 5 bangta te khawsak phungah a lan vek avangin, an intiam anga awm lo leh an insawi loh ang zela khawsa an nih avangin, mipuia an inzawrhna thu tha tinreng te hi an mahni ngeiin an lo bawhchhiat tawh te a ni a, mi nuih a tiza chho mek a ni," a ti.

MNF GS chuan, "Pathian leh kan ram tan tia ke pen thin MNF sawrkar chuan a kalphung nghet Mizo Nationalism kalsan lovin, kan ram, kan hnam leh kan sakhua a dah pawimawh ngar ngar a, a himna tiderthawng thei zawnga hmalakna awm chu a su chat a, a do ngar ngar thin. Inpumkhatna khawmpui pawh Manipur, Tripura leh Shillong-ah a buatsaih a, Pathian leh mipuite duhsakna hmanga chakna a chan leh ngei ringin, chhunzawm zel a la tum bawk a ni," a ti.

Myanmar leh Bangladesh atanga raltlan India sawrkarin thawnlet tura min tihna karah an thu zawm lovin an hum tlat thu te, Inpumkhatna Bus a service tir a, Manipur leh Tahan lamah pawh kalpui turin chak taka hma lak a nih laiin an ram buaina in a nangching tak avangin kalpui a remchang ta rihlo a ti.

Ram humhalhna kawngah pawh sawrkar kal tawh te thlen chin piah lamah a pen a ti a, a tulna in a nanchin miau avangin Silai hmangin BJP kaihhruai Assam sawrkar pawh a kap pawp mai a, nunna chan pawh engemaw zah an awm phah a ni, a ti bawk.

Sawrkar hmasa hun laia Bairabi Zophai-a Mizo Zirlaiten March 10, 2018-a Zofate chawlhbuk sak an tum lai a, Sawrkarin a chhan ngam loh avanga thisen chhuak chunga an tlanchhiatna hmunah thui tak hum letin, Km 5 bawr vel luah zuiin, Duty Post siamin Mizoram Police ten an thutchilh mek niin a sawi.

Zotea chuan, "India ram chhung hmun tam tak leh Manipura Kristiante nekchepna lan tir a, Biakbuk sawisa a, Kristiante tihduhdahna nei mektu BJP in sum hmangin miretheite retheina remchanga hmangin min thlem mek a. An tana hnawk ber MNF te min bei ta ngar ngar a. An thil tawktarh hi kan rinna kawnga kan ke penna tiderthawngtu lian tak a nih dawn avangin, BJP Candidate leh an puanhnuai thurualpui ZPM te hnawl ngam vek tura Mizoram mipuiten ngaihtuahna kan sen a hun chiah a ni. An tellova ram rorelna tha kalpui turin kan tling tawk a ni," a ti bawk.