ZALEN January 19, 2025 : Mizo naupang pangate chuan India Republic Day (January 26, 2025) hian India president hnen atangin huaisen lawmman an dawng dawn.

Mizo naupang huaisen lawmman dawng turte hi F. Ramropuia (14) s/o Lianzami, Thenzawl Venghlun; Zosangpuii (15) d/o Zodingliana, Ruantlang Mualveng; Lalhmingsanga (19) s/o Zaithangpuii, Kanghmun South; Lalrinmawia (16) s/o Lalrotlianga, Sialsuk Babu veng leh Lalhriatzuali (18) d/o R.Vanlalsawma, Thenzawl Bazar veng te an ni.

Naupang huaisen lawmman dawng tur zinga mi, F. Ramropuia, Zosangpuii leh Lalhmingsanga te hi nikum lama dawng tura tih an ni a; mahse, eng emaw rokhawlhna avangin an dawng ta lo a, kuminah hian huaisen lawmman dawng tura thlan thar mi pahnihte nen naupang pangain huaisen lawmman hi an dawng dawn a ni.

Thudawn danin F. Ramropuia hian tui tla a chhanchhuah vangin huaisen lawmman hi a dawng dawn a, Zosangpuii hi a pa electric-in a man a chhanchhuah vanga dawng tur a ni a, Lalhmingsanga hi car-in naupang a tipalh tur a chhanna lama dawng tur a ni.

Kumina huaisen lawmman dawng tura thlan thar, Lalrinmawia hian a thianpa tui tla a chhanchhuah vangin lawmman hi a dawng dawn a, Lalhriatzuali hian a laizawn (cousin) chu electric laka a chhanchhuah vangin a dawng dawn a ni.

Naupang huaisen lawmman dawng turte hian January 24, 2025 hian New Delhi an pan ang a, February 1-ah Aizawl lo letin ruahman dan chuan February 3, 2024 ah social welfare minister-in thingpui a inpui ang.

Thudawn danin Mizoramah naupang huaisen lawmman dawng hi kumina dawng thar tur chhiar tel lohin mi 40 an awm tawh a, an zinga mi 13 hi thih hnua dawng an ni.