Pathiannia zawh tak, Asmita Khelo India Youth, Junior leh Senior Women’s League Zone A-ah Mizoram atanga hmeichhe ritchawi chak kalte chuan medal panga an la a, gold medal pawh a tel.

Nilaini atanga Bhubaneswar, Odisha-ah inelna neihah hian Mizo nulate hian Youth-ah silver pahnih, Junior-ah gold leh bronze pakhat ve ve leh Senior-ah silver pakhat an la.

Inrinni khan Kolasib Saidan nula, Cindy Lalparmawii’n 76kg Youth-ah silver lain Junior-ah bronze a la a. Pathianni khan Zosangzuali chuan +81kg Youth-ah silver, +87kg Junior-ah gold leh +87kg Senior-ah silver medal a la leh bawk.

Keitum nula, Zosangzuali leh Cindy te hi Khelo India State Centre of Excellence (KISCE), Sports & Youth Services (SYS), Rajiv Gandhi Stadium Hostel-a awm ve ve niin coach Malsawma Khiangte, KISCE, SYS hnuaia zirlaite an ni a. Tun tum inelnaah hian coach ho hian Malsawmtluangi, Masseuse, KISCE te nen ritchawi chak pali an kal a ni.

Khelo India hnuaiah hian Zone A hi khawchhak lam state 13 - West Bengal, Jharkhand, Bihar, Chhatisgarh, Odisha leh hmarchhak state pariat an awm a. Tun tum inelnaah hian Youth, Junior leh Senior-ah Odisha vek an champion.