India ramin mipa badminton player a neih tawh zinga ropui ber pakhat, Pullela Gopichand chuan Mizoram pawna inzira Mizo player awmte chu lunglen tawrh theih an zir a tul a ti a, in lamah pawh an haw tlem deuh pawh a ngai niin a sawi.

Gopichand-a hian inkhelh a chawlhsan hnuah kum 2008 khan badminton zirna, Pullela Gopichand Badminton Academy a din a, hetah hian Mizo player pawh an awm mek a, academy dangah pawh an awm nual bawk.

Heng Mizo thalaite hian nasa zawka tan an lak a ngaih thu sawiin, “Lunglen tawrh theih an zir a tul a, mahni in lama an haw tlem deuh a ngai bawk,” a ti a. Academy-a awm mek naupangte leh an nu leh pate chu hemi chungchanga lo fuih thar leh turin Mizoram Badminton Association (MBA) hruaitute nen Thawhlehni tuka an inkawmnaah a sawi a ni. 

National Chief Coach ni bawk, Gopichand-a hian academy-a awm naupangte hian state level tournament phei chu kum khatah vawi khat bak khel lo se a duh thu leh tournament tenau dang phei chu khel tawh lo se tha a tih thu a sawi bawk.

MBA hruaitute hnen atanga thu dawn danin Hyderabad, Telengana-a Gopichand Badminton Academy-ah hian Mizo thahnem tak an awm a, full time-a inzir pawh pasarih lai niin thla khat zel inzir tura kal player 15 vel an awm bawk.

Hei mai a ni lo va, Mizo coach pawh paruk lai an awm a. Mizo coach hi India ram pawnah pathum an awm bawk.

Gopichand-a academy kher ni lo, India ram hmun danga academy-a inzira awm mek Mizo player 15 vel an awm bawk niin MBA hruaitute hian an sawi. 

Badminton Association of India (BAI)-a vice president nihna chelh mektu, Gopichand-a hi ni hnih chamin Thawhtanni khan Mizoramah a zin a, Thawhlehni chawhnu khan a haw a. Tata Trust hotu, Dr Neelam Baradesai, Head of Sports leh Saijit John, Consultant ten an zui. 

An cham chhung hian MBA-in mikhualin Chief Minister Zoramthanga leh Sports Minister Robert Romawia Royte te nen pawh an inkawm a, badminton hmasawnna tur hrang hrang an sawi ho.

Sports minister ho hian Thawhlehni tuk khan Smart City scheme atanga badminton hall lian, Zuangtui Indoor Stadium sak mek an enfiah bawk a. Hall hi peih a nih hunah chuan court paruk a awm thei dawn a, ram pum huap tournament lian thlen theihna tur a ni.

Gopichand-a hi India rama badminton player ropui ber zinga mi niin kum 2001 khan All England Open Badminton Championships-ah champion-in kum 1980-a Prakash Padukone-a hnua India atanga champion leh thei hmasa ber a ni.

All England Open-a a champion bakah hian Commonwealth Games mipa maltanah bronze medal a la tawh a. India-a infiammite chawimawina sang, Arjuna Award leh Dronacharya Award bakah civil mite chawimawina sang ber pathumna, Padma Bhushan pawh hlan a ni tawh.