ZALEN, October 09, 2025: Guwahati, Assam-a BWF World Junior Championship 2025 khelh mekah Mizo rawlthar, C.Lalramsanga chuan team event-ah India chu semifinal a luhpui.

India team hian Ninganiah South Korea hnehin a thiam pariat zingah an tel a, Zirtawpni hian Indonesia nen final luh inchuhin an khel ang.

Quarterfinal-ah hian Durtlang, Aizawl rawlthar, Ramsanga, hian mixed doubles-ah vawi thum leh men’s doubles-ah vawi hnih khelin India chakna kawngah tha thawh hlawk ber zinga mi a ni. 

India team-ah hian Ramsanga bakah H. Lalthazuala, Chanmari West, Aizawl chu men's singles khelin a tel bawk a. Quarterfinal an luh theih nan tha a thawh hlawk hle bawk.

Mizo rawlthar telna India team hi Seeded No. 2 niin group pariat thenah Group H-ah Hongkong, China, Nepal leh Ghana te nen an awmho va, an groupa sang berin quarter final an lut a. Semifinal an invaw thleng leh ta a ni.

Suhandinata Cup tia hriat lar, World Junior Championship-a team inelna hi tun kar chhung khelh tur a ni a, karlehah mi mal inelna a awm zui dawn a. National Centre of Excellence-ah khelh niin Thazuala leh Ramsanga te thian dun hi India aiawha hmarchhak atangin tel phak awm chhun an ni.