ZALEN, November 29, 2025: Mizo Territorial Army lak kalpui mekah tan tum mi 2,700 chuangin hming an pe a, January 18-ah written exam buatsaih a ni ang.

Territorial Army, Aizawl Company Officer in Charge Lt. Col. Goldi Bora chuan hna lak chu tluang taka kalpui a nih thu sawiin hming pe 2,700 chuang zinga physical leh medical test paltlangten kum tharah written exam an hmachhawn dawn thu a sawi.

Inrinni chawhma khan Lt. Col. Bora hian Mizo Territorial Army lak kal mek chungchanga thuthar lakhawmtute a kawmnaah written exam hmachhawn tur zat chu chu an lakkhawm mek avangin sawi theih a la ni lo va, an puan theih thuai a beisei tih a sawi a, hna lak kalpui mek chu a felfai thu leh an hotute pawh an lawm thu a sawi bawk. 

Lt. Col. Bora chuan Mizorama thalaiten hna lak tur an hriat theih nan thehlar lamah tan an lak nasat thu leh lawmawm a tih thu a sawi a. Mizo mipuite tanrualnaah lawmthu sawiin Mizo hmeichhe tam takin an dil chu lawmawm a tih thu a sawi bawk. 

Territorial Army hna lak mekah Mizoram Youth Commission (MYC)-in written exam hmachhawn turte tan crash course an siam tih sawiin a lawm thu leh an mamawh ang pawh an theih anga an pek dawn thu a sawi.

Tun tumah hian hna lak ringawt an buaipui loh thu leh Aizawla an luh tirh atangin hmun hrang hrangah vantlanga tana thil tha tiin outreach hun hrang hrang 27 lai an huaihawt tawh thu a sawi bawk.