ZALEN September 14, 2024 : Emily VL Thakimi d/o D. Rosangzuala, Khatla leh Maximus Lalruatkima s/o Lalmalsawma Hmar, Dawrpui te telna, India ram aiawha mi 60 an telna WorldSkills Lyon 2024 chu naktuk hian a tiak dawn.

Labour, Employment, Skill Development & Entrepreneurship (LESDE) bul tumin, khawvel pum huap thiam thila inelna, WorldSkills Lyon 2024 ah India ram aiawh mi 60 zingah an tel a, WorldSkills 2024 hi Euroexpo Lyon, France ah September 10 atang khan neih a ni a, naktuk September 15, 2024 hian a tiak ang.

Khawvel ram hrang hrang 70 chuang atangin skills hrang hrang a intihsiakna ah mi 1400 chuang leh experts 1300 chuang bakah chhimtu mi enge maw zat an pungkhawm a ni.

Emily leh Maximus te hian kumin May 15 -19 a Delhi a neih, IndiaSkills 2024 intihsiakna ah mi 900 zing atangin Fashion Technology (Emily) leh Floristry (Maximus) ah te Gold Medal an dawng ve ve a ni.

Emily hi Women’s Polytechnic, Aizawl atanga Garment Technology zir chhuak a ni a, Maximus hi PUC-a Public Administration III Semester zirlai a ni.