DOWNLOAD OUR APP

Read latest news on your phone
play-store app-store
app-store
ad
Mizo tlangval
titi ZALEN
May 31, 2020
  • Ramchhana Hmar,
    Phuaibuang
  • Fak phu leh chawimawi phute chu fak a, chawimawi mai tur an ni a, Mizote pawh hian inchawimawi te, an kalna lama mi hmingthate han fak mawlh mawlh pawh kan ching chho ta zel a, a lawmawmin hmasawnna pakhat chu a ni ve reng reng e.
  • Mizo tlangval han tih chuan a tha lama Mizo tlangvalte chet dan sawi tur tam tak a awm a, chawimawina nopui dawm phu ngawih ngawih te, mi hlawhtling an ziahna bua an hming ziahtlak tam tak an awm tawh a. Mahse, tun tumah erawh kan hawi zau lutuk dawn lo va, chutih rualin kan ramin kan mamawh, Mizo tlangvalte an nih avangin an chanchin hi sawi nawn fo va, a la hre lote an awm pawhin hrilh nawn fo tlak a ni ngei ang.
  • Mizo tlangval chanchin sawi tur kan nih rualin hnam dang tlangvalte chanchin kan sawi hmasak a tul leh lawi si a, heti hian insawi tan dawn teh ang. Mizoramah hian vai engzat nge awm? Zawhna chhan theih loh tluk a ni, heng kan thenawmna hnam dang mi kan rama awm mekte hi puitling chin chu kan rama hnathawk vek an ni ti ila, kan sawi sual kher awm lo ve, a bikin kut hnathawh lam hna sawi ta ila, mutia, mistiri, helper adt. heng hna thawk hian hnam dang thalaite’n kan ramah ei an hmu mai ni lovin, kan ngaihnep, kan vau thin, kan nuihzat vaite hian hetiang kan sawi tak hna an thawh avang hian an bank account-ah cheng nuai tam takte an khawl tawh a, chutih laiin a ram neitu thalaite chuan kan ram ngeiah hna kan hmu lo mek chu a ni si a, eng nge a chhan ni ang, hnathawh hi kan zak ta em ni? Zak lo, kan mit en a sang hret niin a lang, dawr lian neitu pawhin vai tel lo chuan a dawr a enkawl thei meuh tawh lo va, vai thawh theih hi Mizo tlangvalte hian kan thawk thei lo nge rawih tlak kan ni lo zawk? Mizo thalaite kan vai chuan kan ni lo, taima tak tak, thawh hreh nei lo te pawh kan awm teuh tho; mahse, thawh tur nei lo, hnathawk peih lo, kan tam avangin kan ramah hnam dang thalaite an champion mek chu a ni ta, kan tan angai ta hle mai. Hna zahawm tak takin min daih vek lo, sawrkar hna te phei chu kan damchhung pawhin indaih tih a awm lo vang, kan phak tawk, kan thiamna mil tawk kan zawna kan thawh ve mawlh mawlh a hun ta.
  • Mizo tlangval ka ngaihsan leh ka chhuan em em te, kut hnathawh zak lo, ni tina inhlawhfa, hlawh tam si, taima bawk si, hnam dang tam tak dah nil theitu leh hnam dang umbotu, Saitual tlangvalte chanchin hi kan hre tawh ngei ang, an fakawmin chhuan tlak an va ni chiang em. Saitualah hian hnam dang (Vai) cement works hna thawktu zu awm miah lova mawle, hun rei tak ata tawh Saitual tlangvalte chuan an mahni khuaa cement hmanga insak chi reng reng chu an kut ken ta vek mai, tha rum tel lovin hnam dang an umbo va, vai rama kan sum luangral tur cheng nuai tam tak an lo hum thei hi an va fakawm em, Saitual khua an tangrual tih lo rual a ni lo, in satu turte, biak in, sikul leh thil dang dang sa turte pawhin an khaw mi leh sa ngei an thlang ngat thei te hi an tangrualna leh ram leh hnam hmangaihna zia ava ni chiang si em.
  • Saitualah hian in ropui leh nalh tak takte, man tam tak takte kawi tinah a awm ve tho, chungte chu Mizo tlangval kutchhuak a tam zawkte an ni an va chhuanawm tehlul em. Thiam inang ro roah mahni hnampui te aia hnam dang ngaisang tlat kan awm thin a, an kutchhuak duh tlat pawh kan awm reng a, Saitualah chuan a ni ve lo, keini chuan kan tlangvalte kutchhuak hi ka duh a ni tih rilru puin hnam dang mistiri reng reng rawih an tum lo, Saitual khua hi eng khuain nge entawn leh ang? Entawnah chuan Saitual khuain cement work thawk tura hnam dang aia Mizo tlangval an ruai thin hi entawn pawi lo ber tur a ni hial awm e. Ram leh hnam hum him hi ram riah chauh tih tur a ni bik lo, tharum hmangin kan hneh lo mai thei bawk; mahse, heng kan thiam thil leh hna thawk a kan chhawrh thinah te hian Mizo nula leh tlangval hi tlang uar ila, chutiang tur chuan thalaite pawhin hnathawh kan uar a ngai a ni.
  • E.Lungdar Venghlun Presbyterian Kohhran khian biak in ropui deuh mai an nei a, a nalhin inkhawm pawh chakawm tak a ni, khi biak in ropui tak khi, Mizopa kutchhuak vek zu nia mawle. Kohhran committee mai bakah kohhran mite inpekna leh hnam dang rawih an duh lohna thinlung khi a ropui khawp mai.
  • Eng nge kan la nghah le! Mi khuate chuan chanchin ropui tak tak sawi tur an nei a, an hnung zui thei tur hi kan awm angem? Vai mistiri ruai lo va, insa ngam mi hausa leh biak in sa tura vai mistiri ruai lo ngam hi punbelh zel teh ang u, mi tam tak kan sawi lo te pawh an awm a, vawi khatah a sawi sen vek loh an ngaihsan awm takzet a ni. Kawng tam takin ram leh hnam a humhalh thei a, haw haw a tih chite a awm a, tharum ngai lo, central sawrkar chinfel kher ngai lo, heng kut hnathawhna kawngah hian ram leh hnam tan tiin mahni hnam pui nula tlangval te ngei hi hnathawk tur pawhin ruai ila, rinawm leh thiam zawk, taima zawk, hauh pawh dawl thei, kan tihna angah hian Mizo Tlangval ngei hi ring ngam zel ila, eng nge hnam dang aia an that loh bikna tur awm chuang le, Mizo Tlangval hma lam pan la, i ram leh hnam tan hian ke rawn pen chhuak zel rawh le!

Latest News & Chhiar Hlawh