ZALEN, Oct. 14, 2024: Mizo tlangval, Lalruatfela chuan Indian Weightlifting Federation (IWLF) buatsaiha National Weightlifting Championships-ah India ram record thar a siam a, Mizoram tan silver medal a la bawk.

Bungzung tlangval, Ruatfela hian Nagrota Bagwan, Himachal Pradesh-a Pathianni kal ta atanga tun Pathianni thleng awh Youth, Junior leh Senior National Weightlifting Championships-ah Inrinni khan Mizoram tan junior kg 89 huangah silver medal a la a ni.

Ruatfela hian snatch-ah kg 132 leh clean & jerk-ah kg 174, a vaiin kg 306-a rit chawiin silver hi a hlawh chhuak a. Clean & jerk bika a chawi hi India (national) record thar a ni.

He huangah hian Andhra Pradesh ritchawi chak, G.Ravisankar chuan snatch-ah kg 135 leh clean & jerk-ah kg 173, a vaia kg 311 chawiin gold medal a la a, Mizo tlangvalin a tluk phak lo hret.

Ruatfela hian tun hnaia Commonwealth Junior Weightlifting Championships-ah India ram tana kg 89 huanga silver medal a lo ta tawh a. Tunah hian National Centres of Excellence (NCOE), Patiala, Punjab-a awm mek.

Mizo lifter hmabak êng tak, Ruatfela hian nikum khan Noida, Uttar Pradesh-a Commonwealth Youth Games neihah kg 81 huangah gold a la tawh a. Nikum vek khan Asian Youth Weightlifting Championships-ah palina niin nikum kum tir khan 5th Khelo Youth Games 2023, Madhya Pradesh-ah khan youth-ah silver medal a lo la a. North East Games 2022-ah leh Sub Junior National 2023-ah gold medal a la tawh bawk.

Hei mai a ni lo va, IWLF-in December 28, 2023 leh January 8, 2024 chhunga National Senior, Junior leh Youth Weightlifting Championships a buatsaihah youth championship-ah Mizoram tan silver medal a la bawk.

Mizoram dinhmun dang

Himachal Pradesh-a inelna neihah hian Mizoram ritchawi chakte hian youth-ah gold, silver leh bronze pakhat theuh an la a. Junior-ah silver pahnih an la bawk.

Youth-ah hian Laithanpuia chuan kg 55 huangah gold a la a, snatch-ah kg 99 leh clean & jerk-ah kg 117, a vaiin kg 216 a chawi a. Isak Malsawmtluanga’n kg 61 huangah snatch-ah kg 106 leh clean & jerk-ah kg 127, a vaia kg 233-a rit chawiin bronze a la a. David Zohmingmawia’n +102kg huangah snatch-ah kg 109 leh clean & jerk-ah kg 153, a vaia kg 262 chawiin silver medal a la.

Junior-ah Ruatfela’n kg 89 huanga silver a lak bakah Silvan Beihrothatlo chuan kg 67 huangah snatch-ah kg 122 leh clean & jerk-ah kg 150, a vaia kg 272 chawiin silver medal bawk a la.

Mi dang tan Mizo tlangval

Tun championship-ah hian Mizo ritchawi chak langsar pahnih chuan Mizoram tan inlan lo mah se an thawhna tan medal an hlawh chhuak bawk.

Senior-ah Mizo ritchawi chak hriat hlawh ber, Jeremy Lalrinnunga chuan kg 67-ah bronze lain Lalhunthara chuan kg 73-ah Services tan silver medal a la bawk.