ZALEN August 7, 2026: Mizo hmeichhe kum tling lo pahnih, Kolasib District lam mi pawngsual rawntu mipa pathum chu Assam Police Dholai, Cachar district te chuan an man.

Thutlakna in a tarlan danin an mi man te hi Amjad Hussain Laskar (20), Rajnagar; Saddam Hussain Laskar (23), Bhaga Bazar leh Rinku Das (25), Khaspur te an ni a, an pawngsual kum 15 leh 16 mi te hian Dholai police station-ah August 3, 2026 zing dar 2:30 velah an in report hnuah pawikhawihtute hi zawngin an man ta a ni

Cachar district Additional Superintendent of Police (Crime) Rajat Pal chuan heng kum tling lo hmeichhe pahnih te chungchang sawiin, "An sawi dan chuan Pawngsual an tum tih an hriat avangin theihtawpin tang mah se, an inveng zo ta lo, an ti a. Kum tling lo a ni tih an sawi hnuah an chungchanga hi Juvenile Justice dan angin kalpui a ni," a ti.

He case hi under sections 70(2) (gang rape of a female minor under 18 years of age) leh 87 (abduction) of the Bharatiya Nyaya Sanhita (BNS), bakah section 6 (aggravated penetrative sexual assault) of the Protection of Children from Sexual Offences (POCSO) Act, 2012 anga ziahluh a nih thu a sawi.

Pal chuan, "Thil thlen dan hi a tuartute sawi dan kan record hmangin kan chhui a. Hemi kaihhnawiha kan mi man te pawh hi dan angin court-ah hruai an ni tawh," a ti a, hmeichhe pahnih te pawh hi a tul dan angin medical exam pawh tih a nih tawh thu a sawi bawk.

Cachar Addl. SP chuan kum tling lo an nih avangin anmahni hi enkawl an nih thu a sawi a, an chhungte nen pawh an inbiak tawh thu a sawi bawk. Kolasib SP Lalrinpuia Varte chuan heng hmeichhe pahnih chhungte zawnchhuah kawngah Assam Police te ngenna angin hma an lakpui tih ZALEN a hrilh a, Vairengte police lamin an chhungte kal velna pawh an buaipui thu a sawi bawk.

Police te chuan tunah hian heng kum tling lo hmeichhe pahnih leh an mi man te intawn dan bakah khawi atangin nge an inphurh tih leh a case kaihhnawih dang te chu an chhui mek tih an sawi.