Mizo zinga BJJ black belt hmasa ber Samuel Lalrozama

Samuel Lalrozama chu Mizote zinga Brazilian jiu-jitsu (BJJ) black belt hmasa ber a ni ta a, Nilaini khan Brazilian jiu-jitsu (BJJ) second degree black belt Bryan Daly chuan a hlan a, India-ah pawh a palina chauh a la ni.

BJJ hi khawvel martial arts awm zinga black belt thlen har berte zinga mi, kum 10 vel tal ngai thin a ni a. Mahni invenna (self defense) leh Mixed Martial Arts (MMA) tana base tha berte zinga mi nia sawi a ni bawk a. Colour belt (blue to brown) pawh India ramah 50 an la tling lo a ni.

BJJ black belt hi tu hnen atanga dawn nge tihin a hlutna a keng thui hle a. Grading petu chu khawvel huapa pawl lian ber, world body lian ber, International Brazilian Jiu-Jitsu Federation (IBJJF)-a inziak lut a ni em tih thlengin an en thin a. Samuela hi IBJJF certified a nih bakah BJJ hmuchhuaktu chhungkaw zirtirte - Grandmaster pahnih, Joe Moreira leh Luiz Palhares hriatpuia belt hi hlan a ni.

Samuela hi Muaythai-ah pawh thleng sang leh sulhnu nei tha tak a ni a, "A pahnih hi a intibuai lo va, soft leh hard style ang deuh niin striking leh grappling inchawhpawlh hlu tak a chhuak thei zawk a; mahse, sport anga khela thlen san duh chuan zir pawlh loh a tha a, MMA zir tan erawh zir kawp ngei a tha," a ti.

Samuela chuan a BJJ zinkawng hi kum 15 a nih tawh thu sawiin, "Hei hi mi mal emaw, Ju-Jujitsu Association of Mizoram (JAM) emaw hlawhtlinna bik a ni lo va, hnam dang, ram pawna mite exam leh zirtirna atangin sum a lut thin ang a, Mizoram economy pawh a nghawng ngei dawn a, lian lutuk lo mah se, sum lutte chu ram pawna training nan leh pawl tana hman zel tur a ni ang," a ti.

JAM President Rothuamliana chuan Mizote leh Mizoram tan mellung pawimawh tak a nih thu sawiin Asian Games-ah BJJ a tel tawh angin chutah chuan medal la ngei tura tan lak an tum thu leh self defense lamah pawh nasa zawka hmalak an tum thu a sawi bawk.

Samuel-a hian black belt a dawn bakah hian jiujiteiro thenkhat hnenah hian belt sang zawk a hlan ve bawk.

PURPLE BELT (INSTRUCTOR)

Lalchhuanmawia

Rohit Halder

K. Lalramchhana

BLUE BELT

MS Dawngtluanga

PC Lalrinmawia

Lalhmangaihzuala

K. Zomuankima

WHITE BELT STRIPES

Lalawmpuia