Chanmari West, Aizawl rawlthar, H.Lalthazuala chu India aiawhin Under 17 Badminton Asia Championship-ah a inlan dawn a, Mizo shuttler zinga India aiawh badminton khel thei hmasa ber tur hian huphurhna pakhat mah a nei lo tih a sawi.

Hyderabad, Telengana-a Pullela Gopichand Badminton Academy (PGBA)-a kum hnih dawn inzira awm tawh, Thazuala hi Thawhlehni khan Younex-Sunrise 35th Sub-Junior (U-15 & U-17) National Badminton Championship, Jwala Gutta Academy, Hyderabad-a khelhah a thlengtu state mi, Pranauv Ram chu final-a 21-11 21-15 a hnehin a champion.

ZALEN-in a biaknaah Mizoram mipa maltan champion nihna chelh mektu ni bawk chuan khawmualpui huap inelnaa a tel tur chu huphurhna a nei lo tih a sawi a. “Ram dang atanga inlan tur player dang hmelhriat ka la nei miah lo va; mahse, huphurhna ka nei miah lo,” a ti.

Kum 16 pumhlum fel deuh chiah, Thazuala hi Mizoram Badminton Association (MBA) Official Championship Badminton Tournament 2023 – Senior-ah mipa maltan champion niin champion thei naupang ber nihna hauh mektu a ni.

Hemi hma hian All India Sub-Junior Under-15 & Under-17 Ranking Badminton Tournament, February-a Jaipur, Rajasthan-a khelhah leh June thla tawpa Lucknow, Uttar Pradesh-a Yonex Sunrise All India Sub Junior Under 15 &17 Ranking Badminton Tournament-ah Under-17 Boy’s Singles category-ah a champion a. Mizo zinga All India Sub-Junior Ranking Badminton Tournament-a Boy’s Singles category-ah vawi hnih champion thei awmchhun a ni.

Infiammi nupa kara piang, Thazuala hian hetiang hlawhtlinna a chan chhan hi Pathian vang liau liau a nih thu a sawi a, “Ka phu lohva sangah min chawi chhuak a ni,” a ti.

Thazuala pa, H.Zohmangaiha hi Mizoram aiawha badminton lo khel tawh thin niin a nu, F.Lalawmpuii pawh volleyball player, state aiawha lo chhuak tawh thin tho a ni a. A nu leh pain an phurpui tih sawiin, “Min beidawnsan lova min fuih kaltu an ni a, an chungah ka lawm hle a ni,” a ti a. An tan tuna a thlen chin aia sang pawh pek let ve ngei a tum thu a sawi.

A champion-na, 35th Sub-Junior (U-15 & U-17) National Badminton Championship-a semifinal a luh khan October 17–22, 2023 chhunga Chengdu, China-a Under 17 Badminton Asia Championship-ah India aiawhin a khel dawn tih a chiang tawh a. A champion zui tak bawk avangin MBA pawhin an chhuang tak zet tih an sawi.

“India rama badminton tournament inchhawrdawhah national championship hi ngaihhlut hlawh ber niin top player-te an inlan kim thin hle a. Hetiang level-a champion thei Mizo rawlthar kan nei hi MBA chuan ropui a tiin, Thazuala a chhuang tak meuh a, a hlawhtlinna chanah a lawmpui tak meuh a ni,” an ti.