Aizawl; Mizo zingah sipai officer 29 leh a pangai (general duty) mi 4000 chuang deuh an awm mek. Sainik Welfare & Resettlement department hotute hnen atanga thudawn danin Mizo sipai Officer hi an tlem sawt hle a, tun dinhmun a officer 29 zinga a sang ber chu Liutenant Colonel a ni. Hetih lai hian general duty ah erawh chuan lut an pung hle mai a, luh tum tam tak an lut theilo zawk hial a ni. Sainik Welfare Director Lalnuntluanga chuan sipai pangngai (GD) hi hlawh leh hamthatna te tha tak pek an nih avang te, pension hnu thleng pawha hamthatna tam tak a awm avangin Mizo thalai te tun aia nasa lehzualin sipai ah tang se a duh tih Zalen palai a hrilh a. Officer ah pawh proffesional leh technical atanga luh a awlsam zawk avangin uar lehzual se a duh tih a sawi a. Tunhma chuan Manipur aiin Mizoram in sipai officer a ngah zawk thin tih sawiin tunah erawh chuan Mizoram in officer 29 a neih laiin Manipur chuan officer 1000 chuang an nei niin a sawi a, hei hi Sainik school an neih vang nia a rin thu a sawi bawk. Sainik Director chuan Chhingchhip ah Sainik School sak mek a ni tih sawiin pawl 6 atanga 12 inkar zirna tur a ni a, hei hi peih anih hun chuan Mizote tam lehzual sipai ah an luh a ring tih a sawi a, he school ah hian kumtin zirlai 100 an nei thei dawn a, heng zinga 60% chu Mizoram state in a chan tur niin a sawi. Tun dinhmunah sipai pension 5000 chuang deuh leh pension la hmeithai 8000 chuang deuh Mizoram ah an awm mek thu Sainik Director chuan a sawi bawk.