October 12, 2023; Innovation- in- Science Pursuit for Inspired Research (INSPIRE) Scheme kaltlanga October ni 9 atanga 11, 2023 chhunga buatsaih 10th National Level Exhibition & Project Competition, New Delhi-a neihah Mizoram State aiawha tel zinga zirlai naupang pahnih te'n INSPIRE Awards MANAK (Million Minds Augmenting National Aspirations and Knowledge) chawimawina an dawng.

INSPIRE Awards MANAK hi Department of Science & Technology, Government of India flagship programme pawimawh tak zinga mi a ni a, kum 2009 atang khan kalpui tan a ni.

Zirlai pawl 6 atanga 10, kum 10 atanga 15 chin tana ruahman niin State Level Competition neih hmasak phawt a ni a, heta ti thate hi National Level Competition-ah an tel leh thin a ni.

National Level Competition tuna neih zawh takah hian India ram pum atangin zirlai naupang 441 an tel a, chung zing atang chuan ati tha zual 60 te National INSPIRE Awards MANAK chawimawina pek anni a. He inelna a Mizo zirlai naupang telte atangin John Lalhruaitluanga, Sacred Heart School, Lunglei leh Lalhmingsangi, JNV Khawzawl-te chuan he chawimawi hi an dawng a. An ni pahnih hi National Innovation Foundation (NIF) in, an model/exhibit-te chu, a taka siam chhuak tur leh patent turin an bawhzui sak dawn a ni.

Heng bakah hian National Awardees hote tan hian SAKURA Programme buatsaih thin a ni a, Japan ramah naupangte hian chawlhkar khat hun an han hmang thin a ni.

He intihsiak ah hian Mizo zirlai naupang 3 John Lalhruaitluanga, Sacred Heart School, Lunglei, Lalhmingsangi, JNV Khawzawl leh K. Darthangmawia, Kids Care School, Aizawl te'n Mizoram ai an awh a, zirlai naupangte hi F. Lalliansanga, Dy. Director, SCERT leh Lalbiakzuala, State Coordinator, NIF te'n an tawiawm a ni.