Player 31 inlanna, Mizoram Snooker & Billiards Association (MSBA) buatsaih, Mizoram 6 Red Snooker Championship Tournament 2024 chu Inrinni zan khan khelh zawh a ni ta a, Lalsangzela, Khatla South chu a champion.

MSBA Hall, Hawla Indoor Stadium-a final-hi tlai dar 6:00 atanga khel tanin race to 6 -a khelh a ni a, zan dar 9:00 dawnah khelh zawh niin Sangzela hian T Laltanpuia, Upper Republic chu 6 - 2-a hnehin a champion a ni.

Zirtawpni zana semi final khelhah Sangzela hian K Lallawmkima chu 5 - 0-a hnehin final a inhlang khai a, Tanpuia hian 5-3-in Lalbiaksanga a hneh ve thung a ni.

Championship hi Thawhtanni tlai atang khan double elimination hmanga khelh tan niin snooker table pali-ah tlai dar 4:30 atanga zan dar 9:00 thleng inkhel a awm thin a. Player 31 inlan zingah 30 chu Aizawl khawpui mi vek niin Siaha atangin pakhat a tel ve bawk.

Nomawi latu, Sangzela hi January 27, 2024-a khelh zawh MSBA buatsaih, Mizoram State 6 Red Snooker Ranking 2024-ah pawh khan champion a lo ni tawh bawk.