Aizawl  August 3, 2023: Vawiin khan Minister R. Lalzirliana chuan kum sawmhnih leh panga chhung Mizoram State Legislative Assembly member leh kum sawm leh panga chhung Cabinet Minister ni theia Pathianin a lo kaihhruai vanga Pathian hnena lawmthusawina hun Armed Veng North Community Centre-a a buatsaih chu Chief Minister Zoramthanga chuan a telpui.

Chief Minister chuan, "Vawiina kan lawm hi thil ropui, Pathian malsawmna hlu leh lawm tlak a ni a, Pu R. Lalzirliana te chhungkua ka lawmpui tak zet a ni. MLA nihna kalkawng hi a hautak hle a, mi vannei, mite duhsak tlak leh taksa hriselna lamah pawh malsawmna dawng nih a ngai thin. Kum 25 zet bial ngai atanga tling thei khawpa malsawmna a dawng hi a hlu hle a, Pathian hnena lawmthu sawina nachang an hria hian an chhungrila Pathian an neih nghehzia pawh a lang a ni. An chhungkaw kal zelna turah duhsakna ka hlan a ni," a ti.

Mizoram-a Cabinet Minister term 3 ni zawn thei awmchhun leh term nga a zawna MLA-a tling thei R. Lalzirliana pawhin thu sawiin, lawmpui tura kal khawm zawng zawngte chungah lawmthu a sawi a, a hun tawn zawng zawngte chu Pathian remruatna leh malsawmna zarah lo thleng a nih thu tarlangin, a lo thawhpui thin zawng zawngte chungah lawmthu a sawi a ni.

R. Lalzirliana hi kum 1998, 2003, 2008, 2013 leh 2018 General Election ah te khan Saitual/ Tawi Constituency atangin thlan tlin a ni. A lawmna hunah hian Minister leh Member of Mizoram State Legislative Assembly ni mek leh lo ni tawh engemawzat leh sawm bik mi thahnem tak an tel a ni.