October 16, 2023 : A naupan lai atanga kut leh ke tin (nail) zuah tuipui tawh, kum 65 mi Vanlalliani, (Maliani) Edenthar, Aizawl chuan a ke tin a la zuah chhunzawm zel a, tun dinhmun a Mizoram a ke tin sei ber nia ngaih a ni.

ZALEN in a kawmna ah Maliani chuan a ke tin sei vangin pheikhawk a bun thei/ngai lo tih a sawi a, tun dinhmun ah a ke tin (ke zungpui tin) sei zawng chu inches 6 bawr vel zet a tling.

A kut leh ke tin zuah chu a naupan lai atanga a tui pui tawh a ni tih sawiin, a nunphung tih khaihlak chang nei thin mah se a nuam tih lam a nih vangin hrehawm a ti ngai lem lo niin a sawi.

Tunah hian Edenthar veng, Aizawl ah a pasal fanau te nen an khawsa a, a tin zuah chu a tliah awlsam avangin dim a ngai hle niin a sawi.

A ke tin zuah vangin bazar hmun leh puipunna hmun dang a tel kawngah harsatna a siam thin a, chung hmunah te chuan a tel/kal tam loh phah viau thin bawk.

A kum te a upa chho ve zel a, hemi vang hian tun dinhmun ah a ke tin chauh a zuah tawh a, tun hma atanga a tin tliak tawh engemawzat dah that a la nei.

A sawi danin, a tin zuah chu hnamdang (vai) ten lei an dil changte pawh a tawng thin a, an lei duh nachhan hre chiah bik lo mah se, record siamna atan an duh a nih a ring.