ZALEN February 24, 2026: Zoram Medical College and Hospital, Falkawn ah Ril leh Pum lam (Gastroenterology) zir hona leh Surgical Workshop chu nimin khan neih a ni a. He workshop hi Department of Surgery, ZMC&H leh Association of Surgeons of Mizoram te ṭang hoa buatsaih niin, Mizoram-a a hmasa ber turin Pancreas Cancer chu Verh (Laparoscopy) in zai a ni.

He Gastroenterology zirhona ah hian Manipal Hospital, Salt Lake, Kolkata atanga lo kal Doctor ten Pancreas Cancer hi an khawih a. Dr. Benjamine Khiangte, Medical Gastroenterologist (Gastro & Liver Clinic) nen tang hoin Endoscopic Ultrasound (EUS) chu a mamawh damlo mi pariat tan a thlawn veka tih sak an ni bawk. EUS hi sawrkar hospital ah Mizoram ah kalpui vawikhatna a ni bawk. ZMC&H doctor-te chuan EUS khawl chu khawl tangkai tak a nih thu leh Mizoram pawna damlo thenkhat refer ngaih chhan a la nih avangin mipui tam zawk ban phaka sawrkar hospital a neih ve theih hunah chuan harsatna tam tak a sutkian ngei an beisei thu an sawi.

He hun hi Prof. Zoramthara Zadeng, Director te, Prof Lalnunmawii Sailo, Medical Superintendent leh Prof C. Vanlalhlua (Sub Dean, Hospital) ten telpuiin, Manipal Hospital lam atanga mikhual te lawmna thu a sawi a. MUHCS hnuaiah damlo ten man chawi lovin engkim an tih theih phah thu a sawi bawk.

Workshop hi nizan lamah CME (Seminar) an chhunzawm a. He hunah hian Gastroenterology lama hmasawnna leh Mizoram hmachhawp te sawihoin, he hun hi Dr. Samuel Lalhruaizela, Associate Professor chuan a kaihruai a. Prof. John Lalliandinga HOD, Dept of Surgery ZMCH chuan kalkhawmte lawmna thu sawiin, Mizoram Surgeon hrang hrangte leh ZMCH lama doctor hrang hrangin an telpui a ni.